Ermahan Ybyraıymov, Sıdneı Olımpıadasynyń chempıony:
Ulttyq qurama 7 joldamany alǵanda bárimiz qýandyq. Shyn máninde, tolyq komandamen Qazaqstan men Ózbekstan ǵana bardy. Biraq ózbekterdiń qurama komandasy óte tabysty óner kórsetip jatyr. Birden 5 boksshysy jartylaı fınalǵa shyqty. Árıne, jigitter jeńip shyqsa, kóńil tolar edi. Endigi bar úmit – Nurbek Oralbaıda ǵana.
Jalpy, bizdiń jigitterdiń kózinde ot joq ekenin baıqadyq. Birinshi raýndta jeńedi, ekinshi jáne úshinshi raýndta jeńiledi. Fızıkalyq turǵydan sharshańqy sıaqty kórindi. Bálkim, basqasha daıyndalý kerek pe edi dep oılaımyn. Bul týraly kelgennen keıin de kóp áńgime bolady. Menińshe, daıyndyq tómen bolǵan sıaqty.
Biraq maǵan Muhamedsabyr Bazarbaıdyń oıyny óte jaqsy unady. Bolashaǵynan úmit kútkizetin úsh jekpe-jek ótkizdi. Onyń ekeýin jeńdi, úshinshisinde grýzıalyq Lasha Gýrılıden jeńildi. Tóreshiler solaı sheshti. Al Sáken Bıbosynov olımpıada jáne eki dúrkin álem chempıony Hasanboı Dýsmatovpen jekpe-jeginde ońbaı súrindi. Bolmashy bir soqqylar jasady. «Nege ondaı soqqy jiberesiń? Odan da qolyńdy kóterip, qorǵanys jasamaısyń ba?! Sonda Hasanboıdyń soqqysy dál túspeı, tóreshilerdiń oıy ózgermes edi ǵoı!» dep «áttegen-aılap» otyrdym. Shyn máninde, Sáken osy joly chempıon bolýǵa múmkindigi bar edi.
Ulttyq quramanyń kapıtany Aslanbek Shymbergenov tý ustaý qurmetine ıe boldy. Ol osy jaýapkershilikti kótere aldy ma, joq pa, oılanyp qaldym. Bálkim, oǵan týdy beker ustattyq pa? Oǵan eshteńe júktemeı-aq óz stılimen bokstasýǵa múmkindik berý kerek pe edi, kim bilsin?! Biraq ıordanıalyq boksshyǵa ese jibergenine qatty qapa boldym.
Mysaly, Ózbekstan boksshylarynyń oıynyn kórdińiz be?! Sonshalyqty myqty oınaıdy. Bir sózben aıtqanda, esh kúmán týdyrmaıdy. Bizdiń jigitterge sondaı senimdilik jetispedi. Sharshy alańǵa shyqqan kezde de aıaq alysy durys bolmady. Talaı jeńis qolymyzdan sýsyp ketti. Aıtalyq, Qamshybek Qońqabaev, Aslanbek Shymbergenov, Mahmud Sabyrhannyń boksyna kóńilim tolmady. Bálenbaı jyldyq tájirıbesi bar, biraz jasqa kelgen boksshylardyń osyndaı óner kórsetkenine ishteı renjidim.
Adam aldymen basyn jumys istetý kerek qoı. Boks degen qarsylasyńnyń murnyn buzý emes. Taktıkalyq turǵyda, shahmat oıyny sıaqty aldap, jeńilin qurban etip, qomaqtysyn qaǵyp alý kerek. Oı-órisi, aldaý tásili, qıas qımyldyń eshqaısysyn kórsete almady. Ashyqtan ashyq kúsh bilegine salyp júrdi. Aldyńǵy qolmen joıqyn soqqy bergenin kórmedim. Shynymdy aıtsam, ishim kúıip, janyp otyrdy. Biraq «jigitter nashar óner kórsetti» dep qatty synǵa da almaımyn. Baryn jasady, alaıda jıǵan tájirıbesin qoldanyp, aqylǵa salyp bokstasý kerek edi.
"Nege.kz" saıtynan yqshamdalyp alyndy