Ómir bolǵan soń, túrli jaǵdaı bolady. Kóńildi birde bult bassa, endi birde aspan sekildi shaıdaı ashylyp, jaıdary kúı keshesiń. Únemi kúlip, baqytty bolyp júrsek, bálkim osynaý «tal besikten jer besikke deıingi» ómirdiń qadir-qasıetin bilmeı jatar ma edik, kim bilsin. Qalaı desek te, osynaý tirshilikti teńseltpeı ustap turǵan – adamdardyń meıirimi, júrek jylýy, mahabbaty.
QUDİRET
«Alsgeımer keseliniń aýyr túrimen aýyratyn pasıentim bar. Ol basqany aıtpaǵanda, óziniń de esimin jıi umytyp qalady. Qaıda, kimmen otyrǵanyn da bilmeıdi. Bir mınýt buryn ne aıtqanyn da esine túsire almaıdy. Biraq bir qyzyǵy, kúnde tańerteń áıelin «Sálem, meniń eń aıaýly Keıtim» dep qarsy alady. Mahabbat degenniń qudireti osynda jatqan shyǵar, bálkim».
SHÁKİRTTER
«Eń kedeı kvartalda muǵalim bolyp jumys isteımin. Kóp oqýshym sabaqqa ashqursaq keledi, tamaqqa tıyndary da bolmaıdy. Óıtkeni, olardyń ata-anasynyń kúndelikti tabatyn nápaqasy tym az. Balalarǵa janym ashıdy, olardyń mıyna sabaq qaıdan qonsyn sosyn. Sondyqtan oqýshylaryma azdan bolsa da aqsha berip turamyn, úzilis kezinde júrek jalǵap alsyn deımin ǵoı. Biraq olar kerek emes degenime qaramastan, arada birshama ýaqyt ótkende ylǵı qaıtarady».
QÝANYSH
«Meniń zaıybym mektepte aǵylshyn tilinen sabaq beredi. Onyń sút bezi obyryna shaldyqqanyn estigen eki júzge jýyq áriptesi men shákirtteriniń «Biz birge kúresetin bolamyz!» degen jazýy bar appaq fýtbolka kıip shyqqany aldymyzdan. Sondaǵy áıelimniń dál sol sáttegideı qýanǵan sátin eshqashan kórmeppin».
MEIİRİM
«Mysyǵym úıden qashyp ketti. Qatty ýaıymǵa battym. Kishkentaı dosymdy endi kórmeıtin shyǵarmyn dep muńaıyp qaldym. Dereý mysyq joǵaltqanym týraly habarlandyrý ildim. Arada bir kún ótkende bir kisi telefon soǵyp, mysyǵymnyń janynda ekenin aıtty. Jedel jettim. Kóshede júrgen úı-kúıi joq qaıyrshy adam maǵan taksafonnan qońyraý shalý úshin 50 sentin jumsapty. Kir-qojalaq adam maǵan sonshalyqty meıirimdi kórindi, tipti mysyǵyma bir qalta tamaq satyp alypty. Álemdi meıirimdilik qutqarady».
ADAMGERSHİLİK
«Búgin kóshede kele jatyp jol apatynyń kýási boldym. Eki kólik qatty soǵylyp qaldy da, birden órtke orana bastady. Birinde ishimdikke toıyp alǵan er adam, ekinshi kólikte jas bala eken. Ekinshi kólikten atyp shyqqan jigit birden apatqa sebepker bolǵan kólikke qaraı umtylyp, mas júrgizýshini shyǵaryp alýǵa jantalasyp jatty».
BİR QUSHAQ GÚL
«Men – florıstpin. Búgin maǵan bir soldat keldi. Ol jaqynda bir jylǵa áskerı boryshyn óteýge alysqa ketkeli jatyr eken. Sondyqtan ol bir jyl boıyna ár aptanyń jumasynda onyń áıeli jigittiń atynan bir qushaq gúl alyp turýy úshin tapsyrys berdi. Men oǵan bir jylǵa 50% jeńildik jasadym, sebebi ol meniń kúnimdi qýanyshqa bóledi ǵoı».
JARYQ KÚN
«Búgin 10 jasqa toldym. Men 2001 jyly 11 qyrkúıekte týǵanmyn. Anam Halyqaralyq saýda ortalyǵynda jumys isteıtin. Onyń bul kúni myńdaǵan adamnyń arasynan tiri qalǵany – sol bir qaıǵyly kúni meni ómirge ákelý úshin perzenthanaǵa ketken bolatyn».
HABARLAMA
«Súıikti qyzymdy jerlep kelgennen keıin júregimdi aýyrtpas úshin telefonymdaǵy barlyq habarlamasyn óshirip tastaǵan edim. Biraq bireýi ǵana óshpeı qalypty. Ol qyzymnan kelgen sońǵy habarlama eken: «Áke, mende bári durys, alańdamańyz. Sony aıtyp qoıaıyn dep».
ÁKE
Búgin «Men seni jaqsy kóremin» degen jazbamdy kúıeýime jiberdim dep oılap, qatelesip ákeme salyppyn. Birneshe mınýttan soń «Men de seni jaqsy kóremin. Ákeń» degen jaýap aldym. Tamaǵyma óksik tyǵylyp, kózim jasaýrap qaldy. Biz bir-birimizge jaqsy kóretinimizdi óte sırek aıtady ekenbiz-aý».
Aýdarǵan Nurjamal ÁLİSHEVA.