Bul suraqqa Almaty qalasynyń Memlekettik kirister departamenti jaýap berdi.
Qolma-qol aqshasyz tólemderdi qabyldaýdan bas tartý faktileri týraly Memlekettik kiris organdaryna habarlaý qajet, dep habarlaıdy Almaty-akshamy.kz
Jańa jyldan keıin almatylyqtar mynandaı problemaǵa tap boldy - taksı júrgizýshileri tólemdi aýdarymmen qabyldaýdan bas tartýda. Mundaı talaptar qanshalyqty zańdy? Bul týraly Almatynyń Memlekettik kirister departamentiniń ókilderi Óńirlik komýnıkasıalar qyzmetinde ótken brıfıńte aıtty.
Sarapshylar sońǵy jyldary mobıldi banktik qosymshalardyń tanymaldyǵy artqanyn, kásipkerler olardy taýarlardy satý jáne qyzmet kórsetý úshin tólemderdi qabyldaý kezinde kóbirek qoldanatynyn atap ótti.
Alaıda, jekelegen kásipkerler satylǵan taýar nemese kórsetilgen qyzmetter úshin qolma-qol aqshamen tóleýdi talap ete otyryp, qolma-qol aqshasyz tólemderdi qabyldaýdan bas tartqan jaǵdaılar bar.
Jýrnalıser «eger taksı júrgizýshileri aqsha aýdarymyn qabyldamasa ne isteý kerek» degen suraq qoıdy.
«Eger adam taksı qyzmetin kórsetse, onda ol tıisinshe jeke kásipker retinde tirkelýi tıis. Siz taksı agregatorlary arqyly, arnaıy qosymshalarda tirkele alasyz. Onyń óz paıyzdary bar. Siz e-Salyq Business nemese Iandeks taksıde jeke kásipker retinde tirkelip, basqa áleýmettik tólemdermen birge aı saıyn 1 paıyz tóleı alasyz. Qazir salyq mindettemelerin oryndaý jeńildetildi. Esep berýdi tapsyrý da jeńildetilgen. QR-kodtardy ornalastyrý da qıyndyq týǵyzbaıdy», - dedi Almaty qalasy boıynsha Memlekettik kirister departamenti túsindirý jumystary jáne baılanys ortalyǵy basqarmasynyń basshysy Aıjan Bekeeva.
Qolma-qol aqshasyz tólemderdi qabyldaýdan bas tartý zańsyz bolyp tabylady.
«Biz buǵan deıin aıtqanymyzdaı, salyq rejımderin qoldanýdyń arnaıy túrleri bar. Taksı júrgizýshileri úshin salyq júktemesiniń paıyzy nebári 1 paıyz bolatyn rejım óte yńǵaıly. Iaǵnı, adam bir aı boıy taksı bolyp júrip, 100 myń teńge tapsa, onyń 1 paıyz salyǵy – 1000 teńge. Oǵan qosa onyń áleýmettik tólemderi. Sonymen, bul qosymsha ne úshin yńǵaıly? Kasalyq mashına qazirdiń ózinde ornatylǵan. Aı saıynǵy qyzmetti satyp alý, tóleý qajettiligi joǵalady. Iaǵnı, ol taksı qyzmetin kórsete alady, chekti elektrondy formatta jazyp, ony klıentke jibere alady», – dep atap ótti Almaty qalasy boıynsha Memlekettik kirister departamenti jeke kásipkerler men jeke tulǵalardy ákimshilendirý basqarmasynyń basshysy Nurlybek Ýspanov.
Qolma-qol aqshasyz tólemderdi qabyldaýdan bas tartý faktileri týraly Memlekettik kiris organdaryna habarlaý qajet.