Almaty polısıasy taksı parkin ashamyn dep tanystaryn aldaǵan Jambyl oblysynyń turǵynyn ustady, – dep habarlaıdy Almaty-akshamy.kz.
27 jastaǵy Jambyl oblysynyń turǵyny taksı parkin ashamyn degen jeleýmen tanystaryn san soqtyryp ketken. Kúdikti aınalasyndaǵylardy taksı parkin uıymdastyrýdy josparlap otyrǵanyna sendirgen. Biraq jolaýshylar tasymalymen qamtamasyz etý úshin oǵan avtokólikter qajet bolǵan. Birneshe tanysy kólikterin taksoparkke berýge jáne kelisim boıynsha kólikterin paıdalanǵany úshin dıvıdendterin alýǵa kelisken. Shyndyǵynda, múldem basqasha áreket bolǵan.
- K.esimdi azamat avtokólikterdi alǵannan keıin úshinshi adamdarǵa satyp, túsken aqshany ózi ıemdengen. Osylaısha ýáde etilgen taksı parki bir kún de jumys istemegen. Aldanǵan azamattar kómek surap bizge júgindi. Kúdikti qamaýǵa alyndy. Onyń áreketi QR QK-niń 190-baby (Alaıaqtyq) boıynsha saralanady. Tergeý jalǵasyp jatyr, — dedi Bostandyq aýdandyq PB-ǵa qarasty polısıa bólimi bastyǵynyń orynbasary Kamal Kelespaev.
Búginde polıseıler ustalǵan adamnyń basqa da yqtımal epızodtarǵa qatysy bar-joǵyn tekserip jatyr. QR QPK-niń 201 babyna sáıkes ózge aqparattar tergeý múddesine oraı jarıalaýǵa jatpaıdy. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.