Qarjy vıse-mınıstri Erjan Birjanov endi elimizde taksı júrgizýshileri jeke kásipker retinde tirkelip, salyq tóleýge mindetti ekenin aıtty, - dep habarlaıdy almaty-akshamy.kz.
Úkimettiń baspasóz ortalyǵynda jýrnalıs vıse-mınıstrge "Qazaqstanda "Iandeks. Taksı" jáne taǵy basqa taksı parkteriniń júrgizýshileri bar. Mysaly, búgin men jumysqa taksımen keldim. Jolaqysyn mobıldi aýdarym arqyly tóledim. Aqsha taksı júrgizýshisiniń áıeliniń atyna tústi. Endi taksı júrgizýshileri men kýrerler salyqty qalaı tóleıdi? Olar úshin salyqty kompanıa tóleı me?", - dep suraq qoıdy.
Erjan Birjanov taksı júrgizýshileri jeke kásipker retinde tirkelýge mindetti ekenin jetkizdi.
"Búginde taksı júrgizýshileri úshin arnaıy salyq rejımi bar. Zańǵa sáıkes, olar jeke kásipker retinde tirkelip, mobıldi qosymsha arqyly 1 paıyz salyq tóleı alady. Olar mindetti túrde salyq organdaryna kelip, tirkelýi kerek nemese mobıldi qosymsha arqyly onlaın (jeke kásipker retinde) tirkele alady. Olarǵa jaǵdaı jasalǵan", - dedi ol.
Sondaı-aq, mınıstrdiń orynbasary zańǵa ózgerister engizilýi múmkin ekenin málimdedi.
"Biz operatordy salyq tóleýshi retinde tirkeýdi qarastyryp jatyrmyz. Osyndaı usynys bar. Mysaly, taksı júrgizýshisi operator arqyly jumys istese, ol salyqty operator ustap, búdjetke aýdarsa, biz ony (salyq tóleý - esk.) mindetinen bosatýdy qarastyryp jatyrmyz. Bul endi bolashaq kodekstiń normasy bolady dep oılaımyz. Máseleni bıznespen (kásipkerlermen - esk.) talqylap jatyrmyz. Qazir qolaıly jaǵdaı bar. Taksı júrgizýshileri mobıldi qosymsha, patent arqyly (jeke kásipker retinde - esk.) tirkelip, 1 paıyz salyq tóleýi kerek. Búginde taksı júrgizýshileri qyzmet atqaryp, qolma-qol aqsha alatyn bolsa, operatorlar tarapynan mundaı júrgizýshilerdiń reıtıńi tómendep, tapsyrysy azaıýy múmkin. Ondaı jaǵdaı bizde jıi tirkelip jatyr. Sondyqtan taksı júrgizýshileri zań aıasynda jumys isteýi kerek dep oılaımyn", - dedi Erjan Birjanov.