Qazaqstanda ǵylymdy damytý el úshin strategıalyq mańyzdy basymdyqtardyń biri bolyp tabylady. Memleket basshysy Ǵylym jáne tehnologıalar jónindegi ulttyq keńeste atap ótkendeı, daryndy jáne qabiletti jastardyń ǵylymmen aınalysýyna jaǵdaı jasaý óte mańyzdy, dep habarlaıdy aqshamnews.kz
Memleket basshysynyń tapsyrmasy boıynsha ǵylymı zertteýlerdi qarjylandyrý kólemi ulǵaıtylyp, ǵylymı uıymdar jańǵyrtylýda. Sonymen qatar, shetelde taǵylymdamalar sany artyp, bul jas ǵalymdardy ǵylymǵa tartýǵa, halyqaralyq yntymaqtastyqty damytýǵa jáne zertteý ınfraqurylymyn nyǵaıtýǵa yqpal etýde.
2025-2027 jyldarǵa arnalǵan ǵylymı zertteýlerdi qarjylandyrý kólemi 531,1 mıllıard teńgege deıin ulǵaıtyldy. Ǵylymdy damytýǵa baǵyttalǵan zańdar qabyldanyp, satyp alý rásimderin jeńildetý úshin sharalar qabyldandy. Sonymen qatar, QR Prezıdenti janyndaǵy Ulttyq Ǵylym akademıasynyń mártebesi jańa ǵylymı uıym retinde belgilendi.
Inovasıalyq ınfraqurylymdy qoldaý maqsatynda Ǵylym qorynyń mártebesi keńeıtildi, ol venchýrlik qarjylandyrýdy tartý jáne biryńǵaı tereze usyný arqyly ǵylymı qyzmetti qoldaıdy. Ǵylymı qyzmetkerlerdiń mártebesin arttyrý úshin ǵylymı uıymdar qyzmetkerleriniń jalaqysy 18%-ǵa ulǵaıtyldy, al ǵylymı ataqtar úshin qosymsha aqylar 50 AEK-ke deıin kóterildi.
Qazaqstanda ǵylymı zertteýlermen 425 uıym aınalysady, bul 2022 jylmen salystyrǵanda 11 uıymǵa kóp. Ǵylymı qyzmetkerlerdiń sany 25,4 myń adamǵa jetti, olardyń 46%-y jas ǵalymdar. Bul kórsetkish jas mamandardyń ǵylymǵa degen qyzyǵýshylyǵy men qatysýyn arttyrýda.
Memleket jas ǵalymdarǵa qoldaý kórsetý úshin kóptegen sharalar qabyldaýda. 2024 jyly Prezıdenttiń tapsyrmasy boıynsha 315 jas ǵalym páter aldy. Onyń 290-y «Otbasy bankimen» birlesip iske asyrylatyn arnaıy ıpotekalyq baǵdarlama aıasynda úı alsa, 25 ǵalymǵa óteýsiz negizde turǵyn úı berildi. Bul sharalar jas ǵalymdardyń áleýmettik mártebesin arttyryp, ǵylymǵa jańa kadrlardyń kelýin yntalandyrýǵa baǵyttalǵan.
Qazaqstanda ǵylymdy damytý úshin jas ǵalymdarǵa jasalyp jatqan qoldaý kóp. Ǵylym salasyndaǵy qarjylandyrýdyń ulǵaıýy, ǵylymı uıymdardyń jańǵyrtylýy jáne jas ǵalymdarǵa arnalǵan túrli baǵdarlamalar bul salany odan ári damyta otyryp, elimizdiń ǵylymı áleýetin arttyrýǵa múmkindik beredi.