Shýche qalasyndaǵy janar-jaǵar maı quıý beketinde bolǵan shabýyldan keıin jedel járdem kóliginiń júrgizýshisi Býrabaı kópsalaly aýdanaralyq aýrýhanasynyń qabyldaý bólmesiniń kómegine júgindi.
Aqmola oblysy Densaýlyq saqtaý basqarmasy baspasóz qyzmetiniń málimetinshe, 10 aqpanda eki feldsher men júrgizýshiden turatyn №2 jedel járdem brıgadasy HYUNDAI sanıtarlyq kóligimen Shýche qalasyndaǵy «Gelıos» janar-jaǵar maı quıý beketine barǵan.
Janar-jaǵar maı quıý kezinde jedel járdem kóliginiń júrgizýshisi men Reseıde tirkelgen memlekettik nómirdegi «Toyota Land Cruiser 200» avtokóliginiń júrgizýshisi arasynda janjal týyndaǵan. Sonyń saldarynan jedel járdem kóliginiń júrgizýshisine dene jaraqaty keltirildi. Oqıǵadan keıin ol medısınalyq kómek kórsetý jáne odan ári baqylaý úshin Býrabaı kópsalaly aýdanaralyq aýrýhanasynyń qabyldaý bólmesiniń kómegine júgindi, - dep túsindirdi basqarmadan.
Aqmola oblysynyń polısıasy shabýyl jasaǵan azamattyń ustalǵanyn málimdedi.
Aqmola oblysynyń polısıa departamenti Shýchedegi janar-jaǵarmaı quıý beketinde jedel járdem júrgizýshisine dene jaraqatyn salǵan er adamdy anyqtady. Sotqa deıingi tergeý bastalyp, kúdikti ýaqytsha ustaý ızolátoryna qamaldy, – dep málimdedi polısıa.