Qazaq óneriniń asqary - Asqar Naımantaev dúnıeden ótti.
Bul týraly onyń ónerdegi dosy ári áriptesi Ulan Núsipáli óziniń Facebook paraqshasynda jazdy, dep habarlaıdy Almaty-akshamy.kz.
«Qosh, qaıran DOS! Qadirińe jete almasaq, kesh bizdi...», - delingen jazbada.
Asqar Naımantaev 1965 jyly, 17-maýsym kúni, Almaty oblysy, Narynqol aýylynda, ónerli ot basynda dúnıege kelgen. Ákesi Ábdiǵalym Naımantaev "Narynqol halyq teatrynda" rejıser, al, anasy Rafıa Raıjanova sol halyq teatrynyń aktrısasy bolyp qyzmet atqarǵan. Asqardyń balalyq ómiri sol teatr irgesinde ótti. Halyq teatr sahnasyna eń alǵash M.Áýezovtyń "Eńlik-Kebek" spektaklindegi Eńliktiń balasynyń ornyna jórgektegi kezinde shyqqan. Ózi rejıserlyq kásippen mektep qabyrǵasynda júrgende aınalysa bastady. Mektep sahnasynda 6-synyptan bastap Q.Jetpisbaevtiń "Bala mergen", S.Júnisovtyń "Jaraly gúlder" sıaqty birneshe spektáklderdi sahnalady.
"Almaty teatr jáne kórkemsýret" ınstıtýtynda KSRO halyq artısi Hadısha Bókeeva men Qazaqstannyń halyq artısi Tuńǵyshbaı Jamanqulovtyń klasynda "teatr jáne kıno akteri" mamandyǵy boıynsha oqyp, dıplom alǵan soń Qazaqtyń M.O.Áýezov atyndaǵy akademıalyq drama teatryna joldama aldy. Teatr sahnasynda kóptegen spektáklderde basty rolderdi somdady. J.Táshenov, I.Savvınnniń "Kóshede júrgen paqyrdy, ákim bol dep shaqyrdy" spektaklinde Nurtaza rolin, Sh.Aıtymatovtyń "Ǵasyrdan da uzaq kún" spektaklinde Sábıtjan rolin, M.Maqataevtyń "Qosh mahabbatynda" Qasym, J.Aımaýytovtyń "Aqbileginde" Baltash rolderin oınap, Ázirbaıjan Mámbetov, Asanáli Áshimov, Bolat Atabaev, Áýbákir Rahımovtaı daryndy rejıserlarmen qyzmet atqardy. Qazaq estradasynyń sahnasynda Asqar Naımantaev "Tamasha" oıyn-saýyq otaýy arqyly kópshilikke tanymal boldy.Respýblıkamyzdyń estrada óneriniń tarıhynda Asqar Naımantaev ashqan "Terisqaqpaı", "Aqqý-Gákký" komedıalyq teatrlarynyń orny erekshe. Asqar aqıyq aqyn Muqaǵalı Maqataev jyrlaryn dáripteýshi retinde de edáýir eńbek etti. "Búgin meniń týǵan kúnim" atty konserttik jobasy Respýblıkalyq telearnalar arqyly birneshe jyl qatarynan ótken dástúrli halyq súıgen jobaǵa aınaldy. "Muqaǵalı atyndaǵy syılyqtyń" quryltaıshysy bolyp, Muqaǵalı murasyn dáripteýge eńbek etken jazýshy, aqyn, ánshi, kompozıtorlardy marapattady. Asqar Naımantaev estrada óneriniń sahnasynda "Retro juldyzdar shaqyrady", "Aıtyńyz qabyl bolsyn", "Jańa jylǵa-jańa juldyzdar" "Qazaqsha dıskoteka" syndy kóptegen tanymal jobalardyń uıymdastrýshy-rejısseri, satıra teatrlarynyń qoıylymdarynyń, "Daıkpress" baspasynan 2004 jyly memlekettik tapsyryspen shyqqan satıralyq "Teris kitap" jınaǵynyń avtory. Muqaǵalı Maqataevtyń murasyn dáripteýge sińirgen eńbegi úshin Aýǵan soǵysy ardagerleriniń "Qazaqstan ardagerleri" qaýymdastyǵy keńesiniń 2007 jyldyń 9-aqpan kúngi sheshimimen "Qaıyrymdylyǵy úshin "Saýap" medelimen marapattaldy. Qazaqstan Respýblıkasynyń 2008 jyldyń 8- jeltoqsan kúngi jarlyǵy boıynsha "Qazaqstannyń eńbek sińirgen qaıratkeri" qurmetti ataǵy berildi. Asqar Naımantaev "Aınalaıyn", "Domashnıe voıny" serıaldarynyń senarıster tobynda bolyp, kóptegen tele jobalardyń, serıaldardyń, sahnalyq qoıylymdardyń senarılerin jazdy. Almaty qalasynda óziniń "Talanttar mektebin" ashyp, onda jas urpaqty ónerge baýlýǵa eńbek etip jatyr. Búgingi tańda ol mektep jastarǵa “Akter óneri” mamandyǵyn oqytatyn “Bilte” akademy” bolyp ózgerip, jumys istep jatyr. T.Júrgenov atyndaǵy Ulttyq óner akademıasynda ustazdyq etedi. 2014 jyly "Astana" telearnasynyń tapsyrysy boıynsha túsirilgen "Domashnıe voıny" serıalynyń qoıýshy rejıseri boldy. 2014 jyldyń mamyr aıynda Jambyl obylystyq qazaq drama teatrynda Ospanhan Áýbákirovtyń "Terisqaqpaı" komedıasynyń jelisimen "Ńóń" atty komedıalyq dýmannyń qoıýshy rejıseri boldy. Premerasy 30,31 mamyr kúnderi bolyp ótti.
2018 jyly Muqaǵalı Maqatev shyǵarmasynyń jelisimen “Aqqýlar uıyqtaǵanda” atty qysqametrajdy. Kórkem-poetıkalyq fılm túsirdi. 2019 jyly “Vampır kúıeý” atty komedıalyq fılm túsirdi. 2020 jyly S.Muqanov atyndaǵy SQO sazdy dram teatrynyń sahnasyna “Meńdýana mahabbat” atty komedıany sahnalady. Premerasy 21-aqpan kúni boldy. Asqar Naımantaev tele júrgizýshy retinde de “TamashaTV” arnasynda “Bir ǵanıbet”, “Jastar TV”arnasynda “Masqara shoý” habarlaryn júrgizdi. Ol habarlardyń, joǵaryda atalǵan fılmderdiń senarılerin ózi jazdy. 2018 jyly stýdentterge arnalǵan “Konferanse - akter jáne kórkemsóz sheberi” kitaby men “Altyn tordan shyqqan án” atty jınaǵy jaryq kórdi. "Domashnıe voıny", “Bastyq bolamyn”, “OryStar v Shymkentte”, “Detektıv áje” ,"Týysqandar", "Buıymtaı", "Ósekshiler" "Vnýkı v aýle" komedıalyq serıaldarynda, Satybaldy Narymbetovtyń "Amanat", Baqytas Sanıtastyń "Tezek" fılmderdinde oınady. basty rolder somdady. Birneshe pesa, kınosenarıler, telejobalardyń, aýdarmalardyń avtory. 2020 jyly Almaty oblysy Raıymbek jáne Uıǵyr aýdandarynda "Hantáńiri" jáne "Qaradala" teatrlaryn ashty. Ol teatrlardyń ashylýy Respýblıka kóleminde eleýli oqıǵa boldy. Eki teatr ashyla sala Germanıanyń Frankfýrt na Maıne qalasynda ótken Halyqaralyq festıváldiń Gran Prı jáne Bas júldesine ıe boldy. Búgingi kúnge deıin Sol eki teatr men 2015 jyly ózi ashqan Qarakemer balalar teatryn (Eńbekshiqazaq aýdany) alǵa súırep keledi. "Qaradala" teatry qazaq pen uıǵyr halqynyń ónerpazdary bas qosa jumys istep jatqan erekshe teatr. Teatr repertýarynda eki ulttyń da qoǵam, ádembıet qaıratkerleri týraly qoıylymdar bar. "Qarakemer" balalar teatry" oblystaǵy balalarǵa arnalǵan jalǵyz teatr. 2022 jyly "Altyn tordan shyqqan án", "Konferanse" , "Teris kitap" atty kitaptary qaıta basylyp, jańadan "Halyq teatrynyń qalta kitaby" atty kitaby jaryq kórdi. Qoǵam qaıratkeri retinde de áleýmetke tanymal tulǵa.
Aqparat Kk.wikipedia.org-tan alyndy