«Qazaqstan halqyna» qoǵamdyq qoryna «Samuryq-Qazyna» qorynyń 2022 jylǵy tabysynan 66,6 mlrd teńge bólý týraly sheshim qabyldandy, dep habarlaıdy Almaty-akshamy.kz QR Úkimetiniń baspasóz qyzmetine silteme jasap.
Prezıdent Q. Toqaev Qazaqstan halqyna Joldaýynda atap ótkendeı, Jańa Qazaqstannyń sıpatyna saı keletin mańyzdy bastamalardyń biri – «Samuryq-Qazyna» qorynyń jyl saıynǵy taza tabysynyń keminde 7%-yn «Qazaqstan halqyna» qoǵamdyq qoryna aýdarý.
«Ulttyq ál-aýqat qory týraly» zańǵa tıisti ózgerister engizildi.
Osylaısha, 2022 jyldyń qorytyndysy boıynsha Qorǵa 66,6 mlrd teńge bólý týraly sheshim qabyldandy.
Qor málimetinshe búgingi tańda medısına, bilim berý, sport, áleýmettik qoldaýdy qosa alǵanda, 6 baǵytta 35-ten astam qaıyrymdylyq baǵdarlamasy iske asyrylýda.
Aýyr, ómirge qaýip tóndiretin jáne orfandyq aýrýlary bar 324 qazaqstandyq jalpy somasy 24,9 mlrd teńgeden astam qymbat dárilik preparattarmen qamtamasyz etilgen. 20 pasıent jalpy somasy 585,1 mln teńgege shetelde em aldy. 4 óńirde 4 Erte aralasý ortalyǵy ashyldy.
Aldaǵy oqý jylyna halyqtyń áleýmettik osal sanattarynan shyqqan stýdentterge 850 bilim berý granty bólindi. 17 óńirde materıaldyq-tehnıkalyq bazasy tolyq jańartylǵan 17 aýyldyq tirek mektebi quryldy. 17 oblysta taǵy 63 mektep boıynsha jumys jalǵasýda.
Aýyldyq jerlerde 24 sport zaly ashyldy, 15 myńnan astam balany qamtıtyn taǵy 76 zal ashý josparlanyp otyr. Óńirlerde jyldam qurastyrmaly modýldi sport zaldaryn ornatý josparlanǵan.
96 bala men jasóspirim ınovasıalyq protezben qamtamasyz etildi. Oǵan 931,9 mln teńge jumsaldy. 10 para-sportshyǵa sporttyq-júgirý protezderi jasaldy. Elde alǵash ret para-sportshylarǵa arnalǵan júgirý mektebi ashyldy. Aýtızm jáne basqa da psıhıkalyq aýytqýlary bar balalarǵa arnalǵan 4 ortalyq ashyldy.
Ulttyq ál-aýqat qorynan aýdarylatyn qarajatty eseptemegende, tek qaıyrymdylyq jarnalarynyń ózi 156 mlrd teńgeni qurady.