Qyzylorda oblysyndaǵy ekologıalyq jaǵdaı Aral-Syrdarıa baseıniniń sýlylyǵyna tikeleı baılanysty.
Aral-Syrdarıa baseıninde 2019 jyldan bastap sý azdyǵy sıkly jalǵasýda dep habarlaıdy almaty-akshamy.kz
Syrdarıa ózeniniń sýlylyǵy Qyrǵyzstan, Tájikstan jáne Ózbekstan aýmaǵyndaǵy sý sharýashylyǵy jaǵdaıyna baılanysty jáne kóbinese «Toqtoǵul» sý qoımasynda (Qyrǵyzstan) sýdyń jınalýymen aıqyndalady. Bıyl Toqtoǵul sý qoımasynda sýdyń jınaqtalý kólemi 2019 jylǵa qaraǵanda 5 mlrd.m3 kem, vegetasıalyq kezeńniń basynda Toqtoǵul sý qoımasynda shamamen 15 mlrd.m3 sý jınaqtalǵan norma bolyp sanalady. Aǵymdaǵy jylǵy 1 sáýirdegi jaǵdaı boıynsha sý qoımasynda 8,7 mlrd.m3 ǵana boldy, bul 2020 jylǵy uqsas kezeńge qaraǵanda 2,9 mlrd. - qa az.
Naryn-Syrdarıa sý qoımalary qulamasy jumysynyń energetıkalyq rejımge aýysýyna baılanysty Shardara sý qoımasyna aǵyn vegetasıalyq kezeńde azaıady jáne vegetasıa aralyq kezeńde ulǵaıady. Osyǵan baılanysty Shardara sý qoımasyn sý tastaý jáne toltyrý rejımi Syrdarıa ózeniniń joǵarǵy aǵysynda ornalasqan sý qoımalarynyń jumys rejımine jáne kórshi elderdegi sý sharýashylyǵy jaǵdaıyna baılanysty. Búgingi tańda Shardara sý qoımasy toltyrý rejıminde jumys isteıdi. Sý qoımasynan sýdy aǵyzý 50 m3/sek aǵynmen júzege asyrylady, kelgen sýdyń kólemi 140 m3/sek quraıdy.
Shardara sý qoımasynan sý aǵyzý aǵyndylyqtyń ulǵaıýyna qaraı kóbeıetin bolady.
Sonymen birge Tájikstan jáne Ózbekstan elderinde vegetasıa kezeńi bıyl qazannyń sońyna deıin jalǵasady. Sondyqtan Shardara sý qoımasyna sýdyń túsýi jáne Syrdarıa ózeniniń tómengi aǵysyna sý jiberý kólemin ulǵaıtý máselesi bıylǵy jylǵy qarashada Memleketaralyq úılestirý sý sharýashylyǵy komısıasynyń kezekti 81-shi otyrysynda qaralatynyn habarlaımyz.