Táýelsizdik jyldaryndaǵy bilim júıesi týraly kitap jaryq kórdi
Almatyda el Táýelsizdiginiń 30 jyldyǵy aıasynda «Qazaqstan Respýblıkasyndaǵy bilim berý júıesin jańǵyrtý» kitabynyń tusaýkeseri ótti, dep habarlaıdy almaty-akshamy.kz BAQ.kz silteme jasap.
Kitaptyń avtory - QR eńbek sińirgen qaıratkeri, pedagogıka ǵylymdarynyń doktory, profesor, QR Ulttyq Ǵylym akademıasynyń akademıgi, Reseı memlekettik bilim akademıasynyń akademıgi Alma Ábilqasymova.
Kitapta elimiz Táýelsizdik alǵan 30 jylda bilim júıesi qalaı damyp, jańǵyrǵany baıandalady. Sondaı-aq kitap qazaq, orys jáne aǵylshyn tilderinde jaryq kórdi.
Tusaýkeser jıyny barysynda avtor kitapty jazýǵa ne sebep bolǵanyn aıtyp berdi.
- Kitapty jazýǵa qalam alý sebebim - osy 30 jyldyń ishinde elimizde bilim júıesiniń sonshalyqty damyǵany, bilim júıesine memleket tarapynan kóptegen qoldaý kórsetilip, qomaqty jumys istelgeni arqaý boldy. Sondyqtan 30 jylda bilim júıesinde jasalǵan jumystyń barlyǵy kitapta jazyldy. Memleket, Elbasy tarapynan qabyldanǵan memlekettik baǵdarlamalar, Bilim jáne ǵylymdy damytýǵa arnalǵan memlekettik baǵdarlamalar, Táýelsizdik alǵan kezdegi qıynshylyqtar. Sondaı-aq 1992 jyly qabyldanǵan "Bilim týraly" zań, osy zańnyń aıasynda talaı iske asqan sharýalar, oqýlyq jasaý tarapynan qabyldanǵan memlekettik qujattar barlyǵy qamtyldy, - deıdi Ábilqasymova.
Almaty qalasy qoǵamdyq keńesiniń tóraǵasy, QR joǵary oqý oryndary qaýymdastyǵynyń prezıdenti, ekonomıka ǵylymdarynyń doktory, profesor Rahman Alshanov avtor Táýelsizdik jyldary bilim salasynda eńbek etip, sol tustaǵy jaǵdaımen etene tanys ekenin aıtty.
- Kitaptyń avtory - osy 30 jyldyq tarıhty jasaǵan adamnyń biri. Qazir el Táýelsizdiginiń birinshi kúninen bastap barlyq salada kóptegen qatelik ketti degen daýlar aıtylady. Avtor sol kezdegi jaǵdaıdy naqty dálelmen keltirip jazǵan. Óıtkeni ózi sol úderistiń ishinde bolyp, júrip ótken tarıhty baıandaǵan. Bul jan-jaqty zerttelgen, tolyq qamtylǵan alǵashqy eńbek. Sonysymen qazirgi kóptegen suraqqa jaýap berip otyr, - deıdi Alshanov.