2023 jyldyń qańtar-jeltoqsan aılarynda qazaqstandyq syra qaınatýshylar 611,2 mıllıon lıtr syra óndirgen. Sáıkesinshe, 2022 jylmen salystyrǵanda 14,8%-ǵa az. 2021 jyly syra óndirisi 15,4%-ǵa qysqaryp, rekord ornaǵan bolatyn.
Bıylǵy qańtarda 29 mıllıon lıtr syra óndirilgen. Bul 2023 jyldyń qańtarymen salystyrǵanda 34,8 paıyzǵa az, dep habarlaıdy almaty-akshamy.kz.
2023 jylǵy qańtar-jeltoqsanda qazaqstandyq syra qaınatý zaýyttary syraǵa suranystyń 89,8%-yn, 2022 jyly 92,4%-yn qamtamasyz etken. Qazaqstan Respýblıkasyna ımporttalǵan syranyń kólemi birden 17,3%-ǵa, 69,6 mln lıtrge deıin ósken. Osylaısha, ımport úlesin 7,6%-dan 10,2%-ǵa deıin ulǵaıtty.
Syra eksporty 20,2 mln lıtrdi qurap, 2,8%-ǵa qysqarǵan. Al ishki naryqtaǵy satylym 12,6%-ǵa, ıaǵnı 660,5 mln lıtrge deıin tómendegen.
Al, Respýblıkalyq psıhıkalyq densaýlyq ǵylymı-tájirıbelik ortalyǵynyń málimetinshe, Soltústik Qazaqstan, Abaı, Pavlodar jáne Shyǵys Qazaqstan oblystary syrany eń kóp ishetin óńirler retinde tirkelse, eń az ishetin óńirler retinde – Almaty, Mańǵystaý jáne Almaty oblystary. Barlyǵy 90,4 myń qazaqstandyq ishimdik máselesine baılanysty esepte tur.
2024 jyldyń qańtar aıynyń sońynda alkogóldik syranyń baǵasy 0,4%-ǵa ósken. Ótken jyldyń jeltoqsan aıynda bul sýsyn 1,3%-ǵa, al 2023 jyldyń qańtarynda 2,9%-ǵa qymbattaǵan.
Qazaqstan Respýblıkasynyń óńirleri arasynda alkogóldik syra baǵasynyń eń joǵary jyldyq ósimi Aqmola oblysynda baıqalǵan. Odan keıingi orynda Ulytaý jáne Mańǵystaý oblystary bolsa, Pavlodar, Túrkistan jáne Jambyl oblystarynda eń arzan baǵa tirkelgen.