Jambyl oblysynda synyptasymen janjaldasyp qalǵan toǵyzynshy synyp oqýshysy kóz jumdy, dep habarlaıdy Aqshamnews.kz tilshisi. Bul - óńirde bir apta ishinde tirkelgen ekinshi oqýshy ólimi.
Oqıǵa qalaı bolǵan?
Áleýmettik jelilerde taraǵan málimetke súıensek, janjal mekteptiń ájethanasynda bolǵan. Aıtýlarynsha, oqýshynyń synyptasy ony keýde tusynan uryp, soqqy aýyr jaraqatqa ákelip soqqan.
Polısıanyń resmı málimdemesi
Jambyl oblystyq polısıa departamenti bul aqparatty rastady. Qazir atalǵan derek boıynsha Qylmystyq kodekstiń 106-baby 3-bóligi ("Basqa adamnyń dármensiz kúıin bile tura nemese oǵan materıaldyq ne ózge de táýeldilikte bolǵan kezde aýyr zıan keltirý") boıynsha sotqa deıingi tergeý bastaldy.
"Jedel-izdestirý sharalary barysynda kúdikti jasóspirim anyqtalyp, ýaqytsha ustaý ızolátoryna qamaldy. Qazirgi ýaqytta isti jan-jaqty, tolyq jáne obektıvti tergeýge baǵyttalǵan barlyq qajetti tergeý amaldary júrgizilip jatyr",-dep habarlady polısıa.
Bir aptadaǵy ekinshi ólim
Eske salaıyq, 12 qyrkúıekte Jambyl oblysy Shý aýdanyna qarasty Kókqaınar aýylynda fýtbol machy kezinde 10-synyp pen 11-synyp oqýshylary arasynda janjal shyqqan. Jasóspirimder arasyndaǵy kıkiljiń kezinde kishi synyptyń bir oqýshysy aýyr soqqy alyp, oqıǵa ornynda kóz jumdy.
Oqıǵa kúni polısıa 16 jáne 17 jastaǵy eki kúdiktini anyqtap, ustaǵan bolatyn.