Qazaq memlekettik sırki Sankt-Peterbýrg pen Máskeýde ótken bedeldi halyqaralyq sırk festıválderinde qos birdeı júldege ıe bolyp, álemdik arenada elimizdiń atyn abyroımen qorǵady.
2025 jylǵy 11–14 qyrkúıek aralyǵynda Sankt-Peterbýrgtegi áıgili Chınızellı sırk arenasynda ótken «Bez granıs» IV Halyqaralyq sırk óneri festıvaline 20 elden 170-ten astam ártis qatysty.
⠀
Qazaqstan atynan festıválge qatysqan Qazaq memlekettik sırkiniń «Hassak» toby (jetekshisi — Adlet Tıkanov) óz ónerimen kórermen men halyqaralyq qazylar alqasyn tánti etti.
Olardyń qoıylymy - 180 kg tartatyn úsh adamdy mańdaıymen kóterip, kópirli baspaldaqpen alyp ótetin ekvılıbr trúgi - kórermen men qazylar alqasyn tańǵaldyrǵan naǵyz sensasıaǵa aınaldy. Bul trúktiń dúnıejúzinde balamasy joq jáne ol Almaty Circus Festival-de resmı rekord retinde tirkelgen.
Festıvál qorytyndysynda «Hassak» toby altyn júldeni jeńip aldy.
Sonymen qatar, Qazaqstan sırki úshin taǵy bir mártebeli oqıǵa - Qazaq memlekettik sırkiniń dırektory Maqsat Maratbekuly atalmysh festıválde halyqaralyq qazylar alqasynyń múshesi retinde shaqyrylyp, elimizdiń sırk óneriniń kásibı ókili retinde baǵalandy.
Sol kúnderi Máskeýde, Svetnoı býlvardaǵy Nıkýlın atyndaǵy sırkte, taǵy bir mańyzdy shara — «ARTIS» III Halyqaralyq sırk festıvali ótti. Oǵan álemniń 18 elinen úzdik ónerpazdar qatysty.
Qazaqstan atynan Almaty sırkiniń ártisi Taısıa Demıdova óner kórsetti. Onyń esimi álemdik sahnalarda keńinen tanymal. Taısıanyń jetistikteriniń qatarynda - Monte-Karlodaǵy halyqaralyq festıváldiń altyn medali, «Idol» festıvaliniń Gran-prıi jáne basqa da bedeldi marapattar bar.
⠀
Máskeýde ótken festıválde Taısıa taǵy da joǵary kásibı deńgeıin dáleldep, qola júldege ıe boldy. Bul jeńis - onyń otandyq sırk ónerindegi bıik ornyn taǵy da aıqyndady.
Qazaq memlekettik sırki - elimizdiń mádenı salasyndaǵy betkeustar ujymdardyń biri. Sırk ártisteriniń halyqaralyq baıqaýlardaǵy tabysy - Qazaqstan sırk óneriniń joǵary deńgeıde damyp kele jatqanyn, ári qazaqstandyq sırk mektebiniń álem sahnasynda laıyqty oryn alatynyn dáleldeıdi.