Almatyda ustaz Covid-19 juqtyrsa, oqýshylarǵa sabaqty JOO stýdentteri ótkizýge daıyn.
Bilim basqarmasynyń basshysy Lázzat Jylqybaeva bastaýysh synyptarda mindetti túrde 2-3 rezervtegi muǵalim bolatynyn aıtty, dep habarlaıdy Almaty-akshamy.kz 31-arnanyń Informbúro aqparattyq baǵdarlamasyna silteme jasap.
Almaty mektepterinde ustazdar Covid-19 juqtyrsa, oqýshylarǵa sabaqty rezervte turǵan muǵalim nemese tájirıbe jınaqtaýshylar ótkizedi. Al ata-analarǵa balasyna kúndelikti 4-5 betperde jáne antıseptık alyp berý mindeti júktelip otyr. Eger otbasynyń mundaı múmkindigi bolmasa, betperdeni mektep beredi. Oqýshylar mektep ǵımaratyna birneshe esikten kirgizilip, kireberiste olardyń dene qyzýyn medbıke ólsheıdi. Munyń aldynda tolyq dezınfeksıalanady. 1,5 metrden kem emes ara qashyqtyq saqtalýy úshin dálizden synypqa jetkenshe arnaıy qyzyl jolaqtar syzylǵan. Munymen qatar, ár 2-3 saǵat saıyn synypty jeldetý, kvars qosý sekildi tazalyq talaptary júrgiziledi. Synyp ishinde sanıtaızer, aýyz sý, betperde mindetti túrde bolady.
Eger bir synyptaǵy oqýshylar sany 35-ten asyp ketse, onda dáris úlkenirek aýdıtorıada ótkiziledi. Mektep ishinde muǵalim de, oqýshy da betperdemen júredi.
«Almatyda eki pedagogıkalyq oqý orny ornalasqan. Joǵary kýrs stýdentteri tájirıbesin mektepte ótýi úshin ýnıversıtettermen tikeleı dýaldy oqytý júıesi boıynsha baılanystamyz. Jalpy, kez kelgen mekteptiń bastaýysh blogynda kem degende rezervte 2-3 oqytýshy bolady», – dedi Almaty qalasy bilim basqarmasynyń basshysy Lázzat Jylqybaeva.
Eger bir oqýshy Covid-19 juqtyrsa, onda synyp túgeldeı onlaın oqýǵa kóshedi. Dál sol sekildi ana-anasy ne bir úıdiń balalary vırýsty juqtyryp alsa, qalǵandary da qashyqtan bilim alady. «Ashyq» qosymshasy tek mekteptiń aýmaǵyna kirgisi keletin ana-analarǵa qajet. Biraq, áke-sheshesi ekpe almaǵan oqýshylar bilim oshaǵyna kirgizilmeıdi degen shekteý joq.
Eske salsaq, Almatyda sońǵy eki apta ishinde mektep jasyndaǵy 1 778 baladan Covid-19 anyqtaldy. Onyń 40-y dál qazir aýrýhanada em alyp jatyr.