Fılıppın bıligi Sebý provınsıasynda bolǵan zilzaladan qaza tapqandar sany artýy múmkin dep qaýiptenip otyr. Qazir qutqarý jáne qalpyna keltirý jumystary júrip jatyr, - dep habarlaıdy aqshamnews.kz tilshisi.
Joıqyn jer silkinisinen kem degende 69 adam kóz jumdy. Odan bólek ondaǵan adam jaraqat aldy. Qaza bolǵandar sany áli kóbeıýi yqtımal. Bul apat eldiń ortalyq bóligin sharpydy.
Miss Asia Pacific International sulýlyq baıqaýy ótip jatqan sátte de dúmpý boldy. Vıdeoda qatysýshylar men qonaqtar sahnadan qashyp shyqqany, tóbeden sylaq pen áshekeı bólikteriniń jerge qulaǵany anyq kórinedi. Economictimes.indiatimes.com málimetinshe, eshkim zardap shekpedi.
Jer silkinisiniń magnıtýdasy – 6,9. Epısentri Sebý aralyndaǵy Bogo qalasynan 17 shaqyrym soltústik-shyǵysta ornalasqan. Provınsıada tótenshe jaǵdaı jarıalandy.
Qutqarýshylar úıindiler astynda qalǵandardy izdep jatyr. Bılik halyqqa kómek jetkizýdi uıymdastyryp jatyr.
Zilzala aımaǵynda ondaǵan ǵımarat tolyq nemese jartylaı qıraǵan. Elektr jaryǵy óshken, joldar men kópirlerde jaryqtar paıda bolǵandyqtan kólik qatynasy qıyndady.
Bul jer silkinisi aımaqqa "Býaloı" jáne "Ragasa" atty daýyldar soqqannan keıin bir apta ótpeı boldy. Fılıppın – Tynyq muhıtynyń "Otty beldeýinde" ornalasqandyqtan, jıi jer silkinisi men janartaý atqylaýyna ushyraıtyn el.