QR Parlamenti Senatynyń depýtaty Súıindik Aldashevtyń aıtýynsha, ótken jyldyń qorytyndysy boıynsha elimizde aıtarlyqtaı energıa tapshylyǵy sezilýde. Bul tapshylyq shamamen 3 mlrd kılovatt saǵatyna jetken, dep habarlaıdy aqshamnews.kz
Elektr energıasynyń tapshylyǵyn sheshý máselesi kúrdeli bolyp otyrǵandyqtan, Memleket basshysy bul sheshimdi halyqtyń ózi qabyldaýyn mańyzdy dep sanap, atom elektr stansıasyn salý máselesin referendýmǵa shyǵarýdy usyndy.
– Bul másele árbir qazaqstandyqty tolǵandyryp otyr. Sondyqtan Memleket basshysy halyqtyń pikirin eskerip, túpkilikti sheshimdi halyqtyń ózi qabyldaýy kerek dep esepteıdi. Biz bul máseleni búgin munaıshylarmen birge talqylap otyrmyz, – dedi Aldashev.
Sondaı-aq, Mańǵystaý oblysynda atom elektr stansıasynyń qurylysyn qoldaý maqsatynda arnaıy halyqtyq shtab qurylyp, belsendi jumys júrgizip jatqanyn aıta ketý kerek. Onyń quramynda saıası partıalar, qoǵamdyq uıymdar ókilderi, sondaı-aq energetıka salasynyń tájirıbeli mamandary bar. Shtab músheleri qazir ártúrli eńbek ujymdarymen kezdesip, qoǵamdy alańdatqan saýaldarǵa naqty ári túsinikti jaýaptar berýde. Bul kezdesýler arqyly halyqty tolǵandyratyn máselelerge qatysty ashyq aqparat berý jáne halyqtyń atom energetıkasy týraly saýatyn arttyrý jumystary júrgizilýde.