Almaty-akshamy.kz saıtynyń búgingi lentasyna sholý – kún kerýeni
Almatyda dástúrli Digital forým
Eýrazıalyq úkimetaralyq keńestiń otyrysy ótedi. Qalalyq polısıa departamenti osyǵan baılanysty 1-2 aqpan kúnderi jol shekteýleri bolýy yqtımal ekenin eskertti.
Shekteý qoıylýy múmkin aımaqtar:
- 1 aqpanda Ál-Farabı dańǵyly, SHAAJ, Qulja tas joly, Saın, Shalápın, Maılın, Buqtyrma kósheleriniń aımaǵynda túzetýler bolýy múmkin.
- 2 aqpan – Ál-Farabı, Seıfýllın dańǵyldary, Saın, Jarokov, Shalápın kóshelerinde.
Pedofılder ómirlik jazaǵa kesilýi múmkin
Májilis depýtattary bul týraly jańa zań jobasyn ázirledi. Depýtattar "Qazaqstannyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly" zań jobasyn qaraıdy.
4 oblysta kólik qozǵalysy shekteldi
Sebep – aýa-raıynyń qolaısyzdyǵy.
2024 jylǵy 31 qańtardaǵy málimet boıynsha, aýa-raıynyń qolaısyzdyǵyna baılanysty 4 oblysta respýblıkalyq mańyzy bar avtojoldardyń 7 ýchaskesinde kólik qozǵalysyna shekteý engizildi.
Aspannyń bıligi...
Elimizdiń Kólik mınıstri Marat Qarabaevtyń aıtýynsha, 22 áýejaı sheteldik ınvestorlarǵa berilýi múmkin.
"Azamattyq avıasıa salasyn damytý jáne kontınenttik tranzıttik hab qurý úshin ınvestorlarǵa otandyq 22 áýejaıdy basqarýǵa berý josparlanǵan", - dedi mınıstr.
Sýdyń suraýy...
Bıyl sý baǵasy qymbattaıdy. Bul týraly Ulttyq ekonomıka mınıstri Álibek Kýantyrov málimdedi.
«Sý tarıfi óte arzan. Lıtrine – 4 tıyn. Árıne, biz sýdy uqypty paıdalanbaımyz. Eger siz qoǵamdyq monshaǵa barsańyz, aǵyl-tegil aqqan sýdy kóresiz. Osynyń ózi bizdiń sýdy durys paıdalanbaıtynymyzdy aıǵaqtaıdy. Al sý degenińiz – tirshilik kózi. Búgin Sý qory mınıstri elimizde sý tapshylyǵy oryn alýy múmkin ekenin eskertti. Sondyqtan sýdy únemdeýge tıistimiz», – dedi Á.Qýantyrov.
Qazaqstan tanker flotyn keńeıtti
Memleket basshysymen kezdesken «QazMunaıGaz» UK» AQ basqarma tóraǵasy Maǵzum Myrzaǵalıev kompanıanyń 2023 jylǵy operasıalyq jáne qarjylyq qyzmetiniń qorytyndysy týraly esep berdi. Berilgen málimetterge sáıkes, byltyr "QazMunaıGaz" 2022 jylmen salystyrǵanda negizgi óndiristik kórsetkishter boıynsha ósimge qol jetkizgen.
Alashtyń Asanálisi
Aıtýly akter Áshimov jeke zattaryn arhıvke tapsyrdy. Onda óner ıesiniń óziniń qoljazbalary, ordenderi jáne ózge de zattary bar. Osyǵan oraı Almatydaǵy memlekettik arhıvte «Kıno jáne teatr tarlany – Asanáli» mýzeı-buryshy ashyldy. Qujattar sany 200-den asady. Kez kelgen qala turǵyndary men qonaqtary arhıvtegi zattardy aldyn-ala ótinim berý arqyly kóre alady.
Ózaǵańmen otyz kún...
Qazaqstan men Ózbekstan azamattary eki el aýmaǵynda 30 kún tirkeýsiz júre alady. Kelisimge ózgerister engizý týraly hattamaǵa 2022 jyly 22 jeltoqsanda Tashkent qalasynda qol qoıylǵan bolatyn.
Jańa qujat eki el azamattarynyń Qazaqstan men Ózbekstan aýmaǵynda bolýy úshin qolaıly jaǵdaı jasaıdy, baýyrlas elder arasyndaǵy ekonomıkalyq baılanystyń, iskerlik jáne mádenı tájirıbe almasýdyń odan ári damýyna yqpal etedi.