Efıopıa men Saýd Arabıasy Koróldiginiń aýmaǵy arqyly evakýasıalaý jumystary jalǵasyp jatyr
Búgingi tańda Qazaqstannyń birqatar azamaty qaqtyǵys aımaǵynan evakýasıalandy. Efıopıa men Saýd Arabıasy Koróldiginiń aýmaǵy arqyly evakýasıalaý jumystary jalǵasyp jatyr, dep habarlaıdy Almaty-akshamy.kz Syrtqy ister mınıstrliginiń resmı saıtyna silteme jasap.
Sýdandaǵy soǵys qımyldary bastalǵan sátten bastap Qazaqstan Respýblıkasynyń Efıopıadaǵy Elshiligi qazaqstandyq azamattardy qaqtyǵys aımaǵynan evakýasıalaý máselesin barynsha pysyqtaýǵa kiristi.
Efıopıada tirkelgen birqatar elshilikter men halyqaralyq uıymdardyń ókilderimen kezdesýler ótkizilip, olarǵa Qazaqstan Respýblıkasynyń azamattaryn Sýdannan evakýasıalaýǵa kómektesý úshin resmı ótinishter jiberildi.
Búgingi tańda Qazaqstannyń birqatar azamaty qaqtyǵys aımaǵynan evakýasıalandy. Efıopıa men Saýd Arabıasy Koróldiginiń aýmaǵy arqyly evakýasıalaý jumystary jalǵasyp jatyr.
Efıopıadaǵy QR Elshiligi azamattarymyzdy Sýdannan kelisilgen jáne qaýipsizdikpen shyǵarý úshin Mysyrdaǵy jáne Saýd Arabıasyndaǵy QR dıplomatıalyq ókildikterimen tyǵyz baılanysta.
QR azamattarynyń naqty sanyn anyqtaý jáne olarǵa Sýdannan evakýasıalaýǵa járdem kórsetý úshin Elshilik janynan jedel jeli ashyldy: +251 945 051 624 (WhatsApp), kazembethiopia@gmail.com, kazembethiopia@mfa.kz.
Elshilik Efıopıa Syrtqy ister mınıstrligine, BUU-nyń Sýdan men Efıopıadaǵy bólimshelerine, sondaı-aq Túrkıa, Reseı jáne Japonıa elshilikterine Qazaqstan azamattaryn evakýasıalaýǵa belsendi kómek kórsetkeni úshin alǵysyn bildiredi.
15 sáýirde Sýdannyń Ulttyq qorǵanys kúshteri men Jedel áreket etý kúshteri arasynda qarýly qaqtyǵys bastalǵan bolatyn. Qazir Hartým qalasynda jáne eldiń basqa aımaqtarynda soǵys qımyldary júrip jatyr. Qaqtyǵys saldarynan qaza tapqan beıbit turǵyndar sany 459 adamǵa jetti, 4 075 adam jaraqat aldy.