QR Eńbek jáne halyqty áleýmettik qorǵaý mınıstrligi sý tasqyny saldarynan zardap shekken qazaqstandyqtarǵa keshendi qoldaý sharalaryn kórsetýde.
Ataýly áleýmettik kómek taǵaıyndaý men múgedektik tobyn qaıta kýálandyrý merzimderi uzartyldy, sýbsıdıalanatyn jumys oryndaryna ornalastyrylǵandar jalaqysyn ózgerissiz alady, al jastardy shaǵyn nesılendirý baǵdarlamasy boıynsha alynǵan kredıtter boıynsha qaryz alýshylarǵa tólemder keıinge qaldyrylady. Mınıstrlik tarapynan qoldaý sharalarymen barlyǵy 15 475 adam qamtyldy, dep habarlaıdy Almaty-akshamy.kz sala mınıstrligine silteme jasap.
TJ rejımi jarıalanǵan qalalar men aýdandarda turatyn 5,3 myń otbasyna ataýly áleýmettik kómek memlekettik organdarǵa júginýdi boldyrmastan avtomatty túrde taǵaıyndaldy.
Sondaı-aq, TJ rejıminiń qoldanylý kezeńinde múgedektigi bar 2,2 myńnan astam adam úshin qaıta kýálandyrý merzimderi avtomatty túrde uzartyldy, osy sharamen 4 myńǵa jýyq adamdy, onyń ishinde balalardy da qamtý josparlanýda. Múgedektigi boıynsha járdemaqy tóleý buryn belgilengen toptar boıynsha júzege asyrylady.
Tótenshe jaǵdaı kezeńinde TJ rejımi jarıalanǵan aýdandar men qalalarda sýbsıdıalanatyn jumys oryndaryna jumysqa ornalasqan 8 myńǵa jýyq jumyssyz adamnyń jalaqysyn eńbek mobıldiligi ortalyqtary jumys berýshilerden málimetterdi talap etpeı tóleıtin bolady.
Sý tasqynynan zardap shekken jastardy shaǵyn nesıelendirý baǵdarlamasy boıynsha qaryz alýshylarǵa shaǵyn nesıeler boıynsha tólemderdi keıinge qaldyrý qamtamasyz etilip, basqa da memlekettik qoldaý sharalary qarastyrylady. 2024 jylǵa arnalǵan kesteler boıynsha barlyq tólemder 2025 jyldan bastap qarjylandyrý kezeńiniń sońyna deıin kelesi tólemderge teń úlestermen bólinedi.
Sonymen qatar, Eńbek jáne halyqty áleýmettik qorǵaý mınıstrligi Sıfrlyq damý, ınovasıalar jáne aeroǵarysh ónerkásibi mınıstrligimen birlese otyryp, «Elektrondyq úkimet» mobıldi qosymshasynda sý tasqyny saldarynan keltirilgen zalaldy óteýge ótinishter berý fýnksıonaldyǵyn engizdi.