Úkimet otyrysynda sý resýrstary jáne ırrıgasıa mınıstri Nurjan Nurjigitov sý tasqyny kezinde sý qoımalarynda 12 mlrd m3 astam sý jınaqtalǵanyn habarlady.
Bul sý qazir ekonomıka salalarynyń qajettiligi úshin paıdalanylady. Mysaly, ótken jyly búkil sý tasqyny kezeńinde sý qoımalarynan jalpy sý aǵyzý shamamen 13 mlrd m3 qurasa, bıyl bir aıda 36 mlrd m3 asty, bul aǵymdaǵy sý tasqynynyń aýqymyn kórsetedi.
«Bul rette, bizdiń sý sharýashylyǵy qurylystary shıelenisti kezeńde sýdy qabyldaýdy jáne qaýipsiz aǵyzýdy qamtamasyz etti, bul tasqyn sýlardy sońǵy jyldary tapshy bolǵan sý aıdyndaryna jiberýge múmkindik berdi», — dep atap ótti Nurjan Nurjigitov.
Mınıstrliktiń málimetinshe, bir Astana sý qoımasyn tasqyn sýlarmen toltyrý 2 mlrd teńgeden astam únemdeýge múmkindik berdi, óıtkeni ony Q. Sátbaev kanaly arqyly qosymsha toltyrý qajettiligi joıyldy. Sondaı-aq Batys Qazaqstan oblysynyń Qamys-Samar kólderine 80 mln m3 tasqyn sý quıyldy. Ulytaý oblysynan Qyzylorda oblysyna 839 mln m3 sý jiberildi. Jyl basynan beri Balqash kóline 12 mlrd m3 sý keldi. ➤ Bıylǵy qyrkúıek aıynyń basyndaǵy jedel derekterge sáıkes, sý qoımalarynan aýyl sharýashylyǵynyń qajettiligine 8,4 mlrd m3 sý, ónerkásipke – 3,7 mlrd m3 paıdalanyldy. Qazirgi ýaqytta Qazaqstannyń Soltústik, Ortalyq, Shyǵys jáne batys óńirleriniń sý qoımalary 80%-ǵa toldy.