Klımattyń ózgerýine beıimdelý, sýdyń «kóleńkeli naryǵymen» kúresti kúsheıtý, sý resýrstaryn basqarýda qoǵamdyq baqylaý: Jańa Sý kodeksindegi basty jańalyqtar
Jańa Sý kodeksi bes negizgi qaǵıdatqa súıene otyryp ázirlendi. Olar: sýdy qorshaǵan ortanyń ajyramas bóligi jáne azamattardyń ómir súrýi men ekonomıkalyq damýdyń negizi retinde taný, sý resýrstaryn paıdalanýdaǵy ekonomıkalyq qundylyq, jerústi jáne jerasty sý resýrstaryn keshendi paıdalaný, sýdy tıimdi jáne utymdy únemdeý, sondaı-aq sý qoryn saqtaý men paıdalaný máselelerin sheshýge jurtshylyqty tartý.
Jańa kodekste sý resýrstaryn basqarý boıynsha Bas jáne baseındik josparlar jasaý kózdelgen. Sonymen qatar gıdrotehnıkalyq qurylystardy jan-jaqty tekserip, olardyń qaýipsizdigi týraly arnaıy qujat daıyndaý mindeti engizilip otyr. Bul nysandardyń tizimi de júıege keltirilmek.
Sý salasyndaǵy zań buzýshylyqtar úshin jaýapkershilik talaptary kúsheıtildi. Ýákiletti organdarǵa jedel áreket etýge múmkindik beretin qadaǵalaý fýnksıalary engizildi. Sýdyń «kóleńkeli naryǵymen» kúresý úshin sýdy ruqsatsyz paıdalanýǵa jol bermeý jáne sý aıdyndarynda, sý qorǵaý aımaqtary men beldeýlerinde sharýashylyq qyzmetke tyıym salýdy saqtaý boıynsha baqylaý kúsheıtildi.
Aýyl sharýashylyǵyndaǵy tıimsiz shyǵyndardy azaıtý máseleleri qaraldy. Irrıgasıalyq kondomınıým qurý tártibi retteldi. Eger ondaı uıym qurylmasa, mundaı múlikti syrttaı basqarý quqyǵy jergilikti atqarýshy organdarǵa beriledi.
Sý sektoryn sý tasqyny men qurǵaqshylyqtyń aldyn alý úshin klımattyń ózgerýine beıimdeý sharalary retteldi. Sý salasyn sıfrlandyrý aıasynda Ulttyq aqparattyq júıe qurý kózdelip otyr.
Sý sharýashylyǵy qurylystaryn esepke alý, olardyń jaǵdaıyn baǵalaý, balamaly sý kózderin paıdalaný, erigen qar sýyn arnaıy ruqsatsyz jınaý jáne sýarýǵa paıdalaný, sý nysandaryn baqylaý boıynsha naqty normalar engizildi.
Kodeks sýmen jabdyqtaý jáne sý burý júıelerin damytý, nóser jáne drenajdyq aǵyndardy retteý, ıesiz júıelerdi komýnaldyq menshikke berý jónindegi normalardy qamtıdy. Sondaı-aq ónerkásiptik qajettilikter úshin aýyz sýdyń ornyna tehnıkalyq sýdy paıdalaný jáne tehnıkalyq aýdıt negizinde sýmen jabdyqtaý jáne sý burý ınfraqurylymyn josparly jańartý sharalary kózdelgen.
Jerasty sýlaryn izdeý, baǵalaý, baqylaý jáne qorǵaý jumystaryn retteý endi mınıstrliktiń quzyretine beriledi. Bul máselelermen Sý resýrstary jáne ırrıgasıa mınıstrliginiń quramyndaǵy Ulttyq gıdrogeologıalyq qyzmet aınalysady.
Sý resýrstaryn basqarý sheshimderine jurtshylyqtyń qatysýy keńeıtildi. Baseındik keńester sý paıdalanýdyń ruqsat etilgen kólemderin qysqartý, sý tasqyny men qurǵaqshylyqqa qarsy is-sharalar, sondaı-aq jergilikti atqarýshy organ jibergen buzýshylyqtardy túzetý jóninde usynystar bere alady.