Qazir bul saladaǵy ortasha jalaqy – 210 myń teńge.
Sý sharýashylyǵy salasy mamandarynyń jalaqysy energetıka jáne jylý energetıka qyzmetkerleriniń aılyǵymen teńestiriledi, dep habarlaıdy aqshamnews.kz
Bul týraly Sý resýrstary jáne ırrıgasıa mınıstri Nurjan Nurjigitov aıtty.
Májilis depýtaty Juldyz Súleımenova sý salasynda 3 myńǵa jýyq ınjener-gıdrotehnık, ırrıgator, sý resýrstaryn basqarý mamany qajet ekenin aıtty. Onyń dereginshe, salada jyl saıyn 200-ge jýyq maman ǵana daıarlanady.
"Bul salanyń 7% suranysyn ǵana jabady. Byltyr 500-den astam stýdent sý sharýashylyǵy mamandyqtaryna barǵan. Biraq búginde sý sharýashylyǵynda jalaqy basqa komýnaldyq saladaǵy jalaqydan aıtarlyqtaı tómen. Bul sońǵy on jylda saladan 30% mamannyń ketip qalýyna sebep bolyp, jastardyń kelýine úlken kedergi bolyp otyr", - dedi depýtat Májiliste ótken Úkimet saǵatynda.
Sý resýrstary jáne ırrıgasıa mınıstri Nurjan Nurjigitov byltyrǵa deıin salada jalaqy tómen bolǵanyn aıtty. Ótken jyldyń 1 mamyrynan bastap "Qazsýsharda" jumys isteıtin 10 myńnan astam mamannyń jalaqysy 25%-ǵa kóterilgen.
"Qazir "Qazsýsharda" ortasha jalaqy 210 myń teńgege teń. Biz "Tabıǵı monopolıalar týraly" zańǵa ózgerister engizip jatyrmyz. Qujat Senattyń qaraýynda. Biz sý sharýashylyǵy salasy mamandarynyń jalaqysyn energetıka jáne jylý energetıka salasy mamandarynyń aılyǵymen teńestiremiz. Bul mamandardyń aılyǵyn taǵy da 50%-dan astamǵa kóterýge múmkindik beredi. Osylaısha jyldyń ekinshi jartysynda mamandardyń jalaqysyn qosymsha 50%-ǵa kóteremiz dep josparlap otyrmyz", - dedi vedomstvo basshysy.
Endi saladaǵy qyzmetkerlerdiń aılyǵy ortasha alǵanda 310-320 myń teńgege deıin barýy múmkin.
"Aılyq kóterilse, mamandar salaǵa keledi", - dep qorytyndylady Nurjan Nurjigitov.