QR Premer-Mınıstriniń orynbasary Tamara Dúısenovanyń tóraǵalyǵymen Ulttyq kásiptik biliktilik keńesiniń kezekti otyrysy ótti. Onyń sheńberinde salalyq biliktilik júıelerin damytý, kásiptik standarttardy ázirleý jáne ózektendirý jónindegi sharalar men josparlar qaralady, dep habarlaıdy almaty-akshamy.kz
Qazirgi ýaqytta ortalyq memlekettik organdar janynan salalyq keńester qurylyp, oǵan sarapshylar, oqý oryndarynyń ókilderi men jumys berýshiler tartyldy. Olardyń ázirlegen kásibı standarttary negizinde joǵary oqý oryndary men kolejderdegi bilim berý baǵdarlamalary túzetiledi. Bul rette túlekterdiń quzyretterin táýelsiz sertıfıkattaý ortalyqtary baǵalaıdy. Osylaısha, eńbek naryǵynyń suranysyna sáıkes keletin sapaly kadr daıarlaý prosesi jetildirilýde.
Otyrys barysynda kólik jáne qarjy mınıstrlikteriniń osy baǵytta atqaryp jatqan jumystary qaraldy.
Kólik vıse-mınıstri Sátjan Ablalıev vedomstvo janynan 6 salalyq keńes jumys isteıtinin habarlady. Olar temirjol, sý, avtomobıl kóligi jáne joldar, sondaı-aq azamattyq avıasıa salalaryn qamtıdy. Keńes qazirdiń ózinde 711 kásipti qamtıtyn 101 kásibı standartty ázirlegen. Bıyl taǵy jańadan 19-yn ázirlep, 31-in ózektendirý josparlanýda.
Kólik mınıstrliginiń boljamyna sáıkes, 2030 jylǵa deıin atalǵan salalarǵa 8,8 myńǵa jýyq maman qajet bolady. Qazir kadrlar 49 joǵary oqý oryndarynda jáne 280-den astam kolejderde daıarlanýda. Vıse-mınıstr oqý oryndarynyń sany kóp kóringenimen, keıbir mamandyqtar boıynsha mysaly, kópirler men temirjoldar qurlysy boıynsha oqıtyn stýdentter az ekenin atap ótti. Sondyqtan Ǵylym jáne joǵary bilim mınıstrligimen birlesip granttardy qaıta bólý máselesi qaralýda.
Qarjy vıse-mınıstri Dáýren Keńbeıildiń málimetinshe, jetekshilik etetin salada «býhgalter» mamandyǵy boıynsha bir kásibı standart paıdalanylady. Ony ozyq joǵary oqý oryndarynyń bilim baǵdarlamalary boıynsha ózektendirý kózdelip otyr. Bul retter ASSA (Association of chartered certified accountants) halyqaralyq biliktiligi boıynsha stýdentterdi oqytý jáne sertıfıkattaý máselesi qarastyrylýda. Osylaısha, dıplom alǵan jáne óz biliktiligin rastaǵan túlekterdi jumysqa ornalastyrý prosesin jeńildetý josparlanǵan.
«Sertıfıkat táýelsiz ortalyqtar tarapynan berilýi mańyzdy. Ol boıynsha jumys berýshiniń maman biliktiligine qatysty pikiri qalyptasady. Oqý ornynyń ımıji de osyǵan tikeleı baılanysty. Bir sózben aıtqanda, biz osy nemese basqa mamandyqty ıgerip jatqan azamatty sapaly jumys ornymen qamtamasyz etý úshin jaǵdaı jasaýymyz kerek», — dep atap ótti Tamara Dúısenova.