Ǵylym jáne joǵary bilim mınıstrligi «Keleshek» biryńǵaı bilim shotyn ashýdy josparlaýda.
2025 jylǵa deıin bilim berý granttarynyń sany 10 paıyzǵa kóbeıedi. Nátıjesinde testileýden súrinbegen 100 myńnan astam abıtýrıent tegin joǵarǵy bilim ala alady, dep habarlaıdy Almaty-akshamy.kz inbusiness.kz silteme jasap.
Biraq aldaǵy eki jyl ishinde stýdentter sany 1 mıllıonǵa jetedi degen boljamdy eskersek, grant sanyn bulaısha kóbeıtý teńizge tamshy quıǵanmen teń.
Sondyqtan Ǵylym jáne joǵary bilim mınıstrligi «Keleshek» biryńǵaı bilim shotyn ashýdy josparlaýda.
Ata-analar balasy mektep tabaldyryǵan attaǵan ýaqyttan bastap shotqa aı saıyn 1 aılyq eseptik kórsetkish kóleminde tólem salyp otyrady. Grantqa ilikpegen jaǵdaıda, talapker jınalǵan qarjyǵa oqı alady.
«Barǵan saıyn joǵary bilimniń qoljetimdiligi tómendep barady. Grant sanyn ósirý máseleni sheshpeıdi. Sondyqtan el azamattary óz úlesin qosa alatyndaı biryńǵaı jınaq júıesin jasamaqpyz. Ata-ana erikti túrde balasynyń shotyna tólem aýdaryp otyrady, jalaqysynan ustalýy múmkin. Al memleketten syıaqy bólinedi. Qazir qajetti esepteýlerdi júrgizip, Úkimetke usynbaqpyz. Maquldansa, aldaǵy 18 jyl boıyna memlekettik búdjetten 15 trıllıon teńgeni únemdep qalamyz», - deıdi QR Ǵylym jáne joǵary bilim mınıstri Saıasat Nurbek.