Bul bastamany iske asyrý úshin zańnamaǵa ózgeris engizý kerek.
Ǵylym jáne joǵary bilim mınıstri Saıasat Nurbek kelesi jyldan bastap joǵary bilim alýǵa 2-3 prosenttik kredıt beriletinin aıtty, dep habarlaıdy Almaty-akshamy.kz
Resmı málimetke sáıkes, bıyl grant sany ótken jylmen salystyrǵanda 19 prosentke ósip, 88 myńǵa jetti. Alaıda aqyly túrde oqıtyn stýdentter de az emes. Olardyń sany 60 prosentti qurap otyr. Osyǵan baılanysty Toqaev sońǵy joldaýynda 2-3 prosenttik kredıt berý máselesin qarastyrýdy tapsyrǵan bolatyn.
Ǵylym jáne joǵary bilim mınıstri Saıasat Nurbektiń aıtýynsha, buryn ondaı mehanızm bolǵan. Ony qaıtadan jandandyrý qajet.
«Men ózim Eýrazıa ulttyq ýnıversıtetinde kredıtpen oqyǵanmyn. Qazaqstanda 90-jyldardyń sońynda sondaı bir jaqsy model bolǵan. Artynan toqtap qaldy. Biz onyń sebebin de bilemiz. Endi osy júıeni qaıta qarap, jyldyq mólsherlemesi 2-3 prosent bolatyn kredıt beremiz. Qazir tıisti ózgerister men tetikter ázirlenip jatyr. Kelesi jyldan bastap engiziledi», - dedi Nurbek Ortalyq komýnıkasıalar qyzmetinde ótken brıfıńte.
Bıyl respýblıka boıynsha 177 myńǵa jýyq bala stýdent atandy. Bul kórsetkish óse beredi. Máselen, osy jyly 400 myńǵa jýyq bala birinshi synypqa bardy. Al 170 myń oqýshy mektep bitirdi. Bul - 10 jyldan keıin mektep bitirýshiler sany eki jarym ese artady degen sóz. Joǵary oqý oryndaryna keletin jastar da kóbeıedi.