Internet-alaıaqtyq jıilep barady
Azamattardyń áleýmettik jelilerdegi onlaın saýda men tanymal saıttar arqyly alaıaqtyq qurbany bolý kórsetkishi aıtarlyqtaı joǵary. Sonymen qatar qylmyskerler onlaın-qaryz alý jolymen jáne bank kartalarynan aqsha jymqyrady, dep habarlaıdy Almaty-akshamy.kz 24.kz-ke silteme jasap.
Bas prokýratýra derekterine áıkes, alaıaqtar kóbinese, qurbanyna ınvestısıa salý, bás tigý, oıyn jáne lotereıany jarnamalaıdy. Ýaqyt ótken saıyn alaıaqtardyń aqsha jymqyrý ádisi kúrdelenip barady.
Alaıda kóp jaǵdaıda alaıaqtardyń qasaqana oıyn iske asyrýyna azamattardyń ózi de kináli. Óıtkeni olar alaıaqtardyń jańa ádisterin bilmeıdi. Internettegi jarnamaǵa senip, ońaı oljaǵa kenelemin dep, opyq jep qalady.
Bas prokýratýra osyndaı qylmystardy azaıtý úshin sıfrlyq tehnologıalardy engizýdi, qoldanystaǵy normatıvtik qujattardy jetildirýdi, İT-baǵdarlamalar men qosymshalardy ázirleýdi kózdeıtin arnaıy Jol kartasyn ázirledi. Alaıaqtardyń qurbany bolǵan adamdardyń oqıǵalary jáne ınternet-alaıaqtar týraly faktiler BAQ-ta jarıalanyp turady. Kıberqylmysqa qarsy kúres ortalyǵynyń da, onyń aýmaqtyq bólimshelerinde shtat sany kóbeıdi.
Onlaın nesıe alý tártibin qatańdatý maqsatynda bıometrıka jáne ESQ qoldaný mindetti boldy. Qarjy naryǵyn retteý jáne damytý agenttigimen birge zańsyz onlaın nesıeler boıynsha aqparat almasý týraly Memorandým jasaldy. Bul ınternet alaıaqtaryna qarsy júrgizilip jatqan jumystardyń mańyzdy bóligi. Qazirdiń ózinde aldyn alý sharalary oń nátıjelerin berýde. Ótken jylmen salystyrǵanda ınternettegi alaıaqtyq faktileriniń sany 7-den 4,5 myńǵa deıin (34%-ǵa) azaıdy. 808 (644) is sotqa joldandy. Óńirlerde osyndaı ispen aınalysqan qylmystyq toptar ustaldy.
Mysaly, Shymkentte ózderin bank qyzmetkeri retinde tanystyrǵan 5 adam qashyqtan qol jetkizý baǵdarlamalary arqyly azamattarǵa nesıe berip, nesıe qarajatyn ıemdenip otyrǵan.
"Eskertemiz, onlaın saýda jasaıtyn kezde kúmándi tranzaksıalardan bas tartyńyz! Bank kartasynyń derekterin, shot nomerin jáne qaýipsizdik kodyn bóten adamǵa bermeńiz! Bankterdiń kúmándi siltemelerin ashpańyz! Kúmán týǵyzǵan silteme boıynsha kirip, ol jerge jeke málimetterińizdi engizbeńiz! Tanymaıtyn adamǵa aqsha aýdarmańyz! Eger bank kartańyzdan aqshany zańsyz alyp qoısa, dereý bankke nemese polısıaǵa habarlasyńyz!" - deıdi Bas prokýratýranyń baspasóz qyzmeti.