Búdjetten qarjylanatyn mádenıet jáne tehnıkalyq sala qyzmetkerleriniń eńbekaqysy aldaǵy úsh jyl aıasynda orta eseppen 20% arttyrylady.
Almaty qalasy máslıhatynyń hatshysy Stanıslav Kankýrov Qazaqstan Prezıdentiniń Joldaýyna baılanysty óz pikirin bildirdi, dep habarlaıdy Almaty-akshamy.kz
Búgin Memleket Basshysy Qasym-Jomart Toqaev Qazaqstan halqyna arnalǵan Joldaýyn jarıalady. Keleshek damýdyń negizgi baǵyttary aıqyndalyp, memleketimizdegi ózekti problemalar jan-jaqty saraptaldy jáne olardy eńserýdiń joldary belgilendi. Osy rette Joldaýdaǵy saıası reformalarǵa toqtalyp ótýdi jón kórdim.
Qazaqstan Táýelsizdik alǵan sátten beri Elbasy N.Á.Nazarbaevtyń bastamalarymen memlekettik basqarý, saılaý, azamattardyń quqyqtaryn júzege asyrý boıynsha keshendi reformalardy turaqty túrde júzege asyryp keldi jáne bul keshendi jumystar qazirgi ýaqytta da jalǵasyn tabýda. Máselen, Joldaý aıasynda saıası jańǵyrtý jáne demokratıa qaǵıdattaryn keńeıtý boıynsha eki jyl barysynda kóptegen oń ózgerister engizilgendigi tilge tıek etildi. Saıası partıalardyń Májiliske ótý kórsetkishi 5%-ǵa deıin azaıtyldy. Saılaý búletenderine «bárine qarsy» baǵany engizildi.
Osymen qatar jańa Joldaýda azamattardyń memleketti basqarý isine keńinen aralasýyn qamtamasyz etip, memlekettik apparat jumysynyń tıimdiligin arttyrýǵa nazar aýdaryldy. Kórip otyrǵanymyzdaı saıası reformalar júıeli jalǵasyn tabýda. Bul bastamalar halyq ıgiligi úshin jasalyp jatyr. Osy rette aýyl ákimderin tikeleı saılaý asa mańyzdy qadam boldy. Prezıdent aıtyp ótkendeı, bul - ádil ári ozyq memleket qurýdyń birden-bir durys joly. 2024 jyly azamattar pılottyq rejımde aýdan ákimderin saılaýǵa múmkindik alatyn bolady.
Kelesi mańyzdy másele jergilikti ózin-ózi basqarýda azamattyq mádenıetti damytý boldy. Osy rette Prezıdent ákimshiligine azamattyq bastamalardy qoldaý boıynsha tıimdi mehanızm ázirleý tapsyryldy. Saılaý tizimderine 30% áıel azamatshalar men jastardyń úlesi boıynsha normalar engizý saıası partıalardyń óz jumysynyń belsendiligin arttyrýǵa jáne quramdaryn jasartýǵa ıtermeledi. Kelesi kezeńde, ıaǵnı depýtattyq mandattardy bólý aıasynda bul bastama jalǵasyn tabady. Atalmysh kvotany depýtattyq mandarttar berý aıasynda zańnama turǵysynda bekitý tapsyryldy. Osymen birge, erekshe qajettilikteri bar azamattardy da joǵaryda atalǵan kvotaǵa qosý boıynsha óte oryndy pikir aıtyldy. Bul - ınklúzıvtik qaǵıdattaryn kúsheıtýdiń taǵy bir qadamy.
Taǵy bir mańyzdy jáıt - qıyn jaǵdaıǵa tap bolǵan azamattarǵa qoldaý kórsetý. Aldaǵy ýaqytta áleýmettik baǵdarlamalar aıasynda kómekke shynymen muqtaj jandarǵa járdem kórsetiledi. Bul úshin arnaıy áleýmettik kodeks ázirlenedi.
Joldaýda halyq ıgiligi jolyndaǵy bastamalardy erekshe atap ótý kerek. Olardyń qatarynda mınımaldy eńbekaqy kóleminiń arttyrylýy qarastyrylǵan. Osynyń arqasynda halqymyzdyń kirisi artyp, makroekonomıkalyq damýy kúsheıedi. Bul shara tikeleı 1 mılıonnan astam adamǵa áser etedi, al janamaly túrde barlyq eńbek etip kele jatqan azamattarǵa oń yqpalyn tıgizedi. 6,5 mıllıon jaldamaly qyzmetkerlerdiń eńbekaqysynyń artýyna memleket tarapynan arnaıy yntalandyrý sharalary qabyldanady. Bul asa mańyzdy qadam. Osymen birge mıkro jáne shaǵyn bıznestiń eńbekaqy tóleý qoryna salyqtyq tólemderdi azaıtý da asa mańyzdy shara bolady. Bul kóleńkeli túrde eńbektenip júrgen azamattardyń sanyn azaıtýǵa múmkindik beredi.
Búdjetten qarjylanatyn mádenıet jáne tehnıkalyq sala qyzmetkerleriniń eńbekaqysynyń aldaǵy úsh jyl aıasynda orta eseppen 20% arttyrylyp otyrýyn atap ótkim keledi. Bul jaǵymdy jańalyq elimizdiń 600 myńǵa jýyq azamattarynyń áleýmettik jaǵdaıynyń nyǵaıýyna zor úlesin qosady. Taǵy bir mańyzdy másele - áleýmettik osal toptaǵy azamattarǵa, búdjettik sala qyzmetkerlerine, jas otbasylar men mamandarǵa arnalǵan biryńǵaı memlkettik turǵyn úı baǵdarlamasy jasaqtalatyn bolady.
Kórip otyrǵanymyzdaı, Joldaýda halqymyzdyń ál-aýqatyn nyǵaıtýǵa arnalǵan aýqymdy maqsattar men mindetter qarastyrylǵan.