Almatyda bazarda jumys isteıtin NEET sanatyndaǵy jastar arasynda «Jastar CUP – 2025» sporttyq týrnıri ótti.
Jarys Almaty qalasy Jastar saıasaty basqarmasynyń bastamasymen uıymdastyryldy, - dep habarlaıdy Aqshamnews.kz.
Joba jastar arasynda sportty damytýǵa, azamattyq belsendilikti arttyrýǵa jáne komandalyq ózara is-qımyl arqyly áleýmettik ıntegrasıany kúsheıtýge baǵyttaldy. Týrnır 2025 jylǵy 24 qarashada bastalyp, 15 jeltoqsanda óz máresine jetti. Týrnırge 16 komanda qatysyp, jalpy 200-ge jýyq jas qamtyldy.
Týrnır salaýatty ómir saltyn nasıhattaýmen qatar, NEET sanatyndaǵy jastardy qosa alǵanda, jastardyń áleýmettik belsendiligin arttyrýǵa baǵyttaldy. Komandalyq format pen básekelestik orta jastardyń jaýapkershilik sezimin jáne qoǵamǵa degen tıesililigin nyǵaıtty.
«Jastar is-sharalary jastarǵa tek emosıa ǵana emes, sonymen qatar damý men ózin-ózi júzege asyrý múmkindikterin usynýy tıis. „Jastar CUP – 2025“ — sport arqyly jastardyń qalalyq prosesterge belsendi qatysýyna jaǵdaı jasaıtyn, damý múmkindikterin tabatyn jáne jalpy úderistegi mańyzdylyǵyn sezinetin format tıimdi format», - dedi Almaty qalasy Jastar saıasaty basqarmasynyń basshysy Azız Kajdenbek.
Sonymen qatar, is-shara aıasynda áleýmettik blok uıymdastyrylyp, machtar kúnderi jastarǵa arnalǵan jumyspen qamtý jáne HR keńesteri, quqyqtyq jáne aqparattyq qoldaý, bilim berý jáne qarjylyq saýattylyq baǵyttary, memlekettik qyzmetter baǵyttary boıynsha keńistikter jumys istedi.
İs-shara Almaty qalasynda jastardy jumyspen qamtýǵa baǵyttalǵan júıeli saıasat aıasynda ótti. 100-den astam qatysýshy jumysqa ornalasý máseleleri boıynsha, quqyqtyq keńester jáne onlaın jáne oflaın kýrstarǵa qatysty usynystar aldy. Qoldanbaly daǵdylardy damytýǵa arnalǵan «Skill All» oflaın baǵdarlamasy aıasynda 20-dan astam adam kýrstarǵa jazyldy, al 10-nan astam qatysýshy alynǵan bilim men mamandardyń usynystarynyń arqasynda jumysqa ornalasty.
Osylaısha, «Jastar CUP – 2025» týrnıri jastardyń áleýmettenýine, kásibı baǵdarlanýyna jáne qala ómirine belsendi aralasýyna yqpal etetin keshendi alańǵa aınaldy.