Qasym-Jomart Toqaev Komatsu kompanıasy dırektorlar keńesiniń tóraǵasy Hıroıýkı Ogavany qabyldady
Kezdesýde Memleket basshysy Komatsu kompanıasy elimizdiń taý-ken ınfraqurylymyn damytýǵa eleýli úles qosyp kele jatqan senimdi ári ýaqyt tezinen ótken seriktesi sanalatynyn atap ótti.
Prezıdent kompanıanyń Astana qalasynda tehnıkalardy kúrdeli jóndeýge jáne qaıta qalpyna keltirýge arnalǵan óndiristik keshen salý týraly sheshimin quptady.
Hıroıýkı Ogava strategıalyq turǵydan mańyzdy naryq sanalatyn Ortalyq Azıanyń áleýeti joǵary, múmkindigi mol ekenine toqtaldy. Ol jańa keshenniń aımaqtaǵy taý-ken kompanıalarynyń tehnıkalaryn az ýaqyt ishinde tómen baǵada jóndeıtin ári olarǵa jedel servıstik qyzmet kórsetetin óńirdegi iri habqa aınalatynyn málimdedi.
Memleket basshysynyń aıtýynsha, Qazaqstan óndiristi lokalızasıalaýǵa, elder arasyndaǵy ónerkásiptik yntymaqtastyqty odan ári nyǵaıtýǵa, ulttyq ekonomıkanyń básekege qabilettiligin arttyrý úshin ozyq tehnologıalar alýǵa nıetti.
Kezdesý barysynda maman daıarlaý máselesine basa mán berildi.
Qasym-Jomart Toqaev Komatsu kompanıasynyń elimizde operatorlarǵa, mehanıkter men ınjenerlerge arnalǵan aımaqtyq oqytý ortalyǵyn ashý týraly bastamasyna qoldaý bildirdi. Sondaı-aq bul jobanyń adamı kapıtaldy damytýǵa, ónerkásiptik seriktestikti tereńdetýge zor úles qosatynyn aıtty.
Komatsu qurylys, taý-ken, jol jáne ındýstrıa salalaryna qajetti tehnıkalar óndirýge mamandanǵan álemdegi eń iri mashına jasaý korporasıalarynyń biri sanalady.