Qazaqstanda rezeńke jáne plasmassa buıymdaryn óndirýge baǵyttalǵan ınvestısıalyq jobalar qarqyndy damyp keledi.
Bul sala óńdeýshi ónerkásipti damytýda jáne qosylǵan quny joǵary jańa óndiristik tizbekterdi qalyptastyrýda mańyzdy baǵyttardyń biri retinde qarastyrylýda, - dep habarlaıdy Aqshamnews.kz.
Bıyl rezeńke jáne plasmassa buıymdaryn óndirý boıynsha jeti joba iske qosyldy. «QazIndustry» AQ Jobalardy iske asyrýǵa monıtorıń júrgizý jáne taldaý dıreksıasynyń derekterine sáıkes, jobalarǵa salynǵan ınvestısıa kólemi 14,6 mlrd teńgeni qurady, nátıjesinde 200-den astam turaqty jumys orny ashyldy. Atap aıtqanda, polımerli úldir (plenka), vakýmdyq jáne taǵamdyq qaptamalar, tamshylatyp sýarý lentalary, fıtıngter jáne PVH-dan jasalǵan qaptama qubyrlar óndirisi jolǵa qoıyldy.
Budan bólek, qazirgi ýaqytta iske asyrýdyń ártúrli kezeńderinde jalpy ınvestısıa kólemi 46,9 mlrd teńgeden asatyn 19 joba bar. Olardyń qatarynda geomembrana men geosıntetıka, keńsege arnalǵan plasıkalyq taýarlar, tereze jabyndary, qubyrlar men shlangtar, plasıkalyq ydys-aıaq jáne ózge de ónimder óndirisi bar. Atalǵan jobalardy júzege asyrý nátıjesinde 900-den astam turaqty jumys orny ashylady, onyń ishinde 250-ge jýyǵy aýyldyq jerlerdegi azamattardy jumyspen qamtamasyz etýge múmkindik beredi.
Sonymen qatar, jumsaq qaptama, BBPP-plenkasy, PET-preforma, evropoddon, qoqys jáshikteri jáne ózge de taýarlar óndirisine baǵyttalǵan taǵy 13 joba pysyqtaý kezeńinde tur. Josparlanǵan ınvestısıalardyń jalpy kólemi 265,2 mlrd teńgeni quraıdy, atalǵan jobalar aıasynda 1,7 myń jańa jumys ornyn ashý kózdelip otyr.
Osylaısha, Qazaqstanda rezeńke jáne plasmassa buıymdary óndirisiniń ósýi polımer ónerkásibindegi joǵary tehnologıaly baǵyttardyń damýyna serpin berip, qaptama salasyna arnalǵan jartylaı fabrıkattar shyǵarýdy arttyrýǵa, qurylys materıaldarynyń otandyq bazasyn nyǵaıtýǵa jáne quramdas bólshekter ımportyna táýeldilikti azaıtýǵa yqpal etedi.
Jalpy, saladaǵy aǵymdaǵy 39 jáne aldaǵy ýaqyttardaǵy jobalar boıynsha shamamen 2,8 myń jańa jumys ornyn ashylyp, 362,7 mlrd teńge kóleminde ınvestısıa tartý josparlanyp otyr.