Uly Otan soǵysyna ketken jerlesterimizdiń súıegi tabylyp jatyr
Ekinshi dúnıejúzilik soǵys kezinde qaza bolǵan júzden astam qazaqstandyq jaýyngerdiń súıek qaldyqtary Harkov oblysynan tabyldy, dep habarlaıdy Almaty-akshamy.kz Qazaqtv.com caıtyna silteme jasap.
Sarapshylar olardy 1942 jyly osy aımaqta qandy qaqtyǵys kezinde erlikpen kóz jumǵan «106-shy Aqmola» atty áskerı dıvızıanyń sarbazdary bolýy múmkin dep otyr.
Qazirgi tańda Harkovta elimizdiń arnaıy izdestirýshiler toby jumys istep jatyr. 5 jyldan astam osy óńirde izdeý jumystaryn júrgizip kele jatqan ýkraınalyq áriptester 500-ge jýyq áskerdiń súıegin qazyp alǵan eken. Degenmen áli kúnge deıin marqumdardyń esimderi anyqtalmaǵan.
Sondaı-aq, Ýkraına túbinde urysqa qatysqan kóptegen jaýyngerdiń urpaqtary búginde Aqmola oblysynda turady. Olar ata-babalarynyń máıitterin týǵan jerine alyp kelip, qaıta jerleýge bolady dep úmittenip otyr. Sonymen qatar bul ekspedısıa Ýkraınada júrgizilgen elimizdiń tarıhı-muraǵattyq jobasynyń birinshi kezeńi bolmaq.
«İzdeý jumystary kezinde aýqymdy istiń bir ǵana bóligin qamtydyq. Negizgi jumystyń ózegine áli jetken joqpyz. 350 ásker ǵana emes, on myńdaǵan adamnyń súıegi jatyr. Solardyń jeke zattarynan bastap kim ekenin anyqtaýymyz qajet. Aldaǵy ýaqytta ýkraınalyq áriptesterimizben birigip memorıaldy aımaq qurǵymyz keledi», - dedi «Memorıaldy aımaq» izdeý jasaǵynyń komandıri Maıdan Qusaıynov.