Jańa jyl merekesí kezínde qoǵamdyq qauípsízdíktí qamtamasyz etu, sondaı-aq azamattyq pırotehnıkalyq būıymdaryn jeke jáne zańdy tūlǵalardyń belgílengen talaptardy saqtauyn baqylau maqsatynda "Pırotehnıka" sharasy ótude, – dep habarlaıdy Aqshamnews.kz.
Polisia.kz málímetínshe, sharany ótkízu úshín 1 myńnan astam bírlesken reıdtík top qūryldy, olar 2 myńnan astam reıdtík ís-shara ótkízdí.
– Ís-shara barysynda pırotehnıkalyq būıymdardyń aınalymy qaǵıdalaryn būzudyń 90-ǵa juyq deregí anyqtaldy. Onyń íshínde tauarlar nemese ózge de zattardy zańsyz satu boıynsha 84 derek jáne eldí mekenderde árí arnaıy bólínbegen oryndarda pırotehnıkalyq būıymdardy qoldanu arqyly azamattardyń tynyshtyǵyn būzu boıynsha 5 derek tírkeldí. Qūqyq būzushylardan 705-ten astam dana jáne 100-ge juyq qorap sertıfıkattalmaǵan pırotehnıkalyq óním tárkílendí. Qauípsízdík maqsatynda pırotehnıkalyq būıymdardy tek osy qyzmet túríne tıístí lıtsenzıyasy bar mamandandyrylǵan dúkenderden jáne statsıonarlyq sauda pavılondarynan ǵana satyp alu qajet. Pırotehnıkany, yaǵnı petardalar, feıerverkter, bengal ottaryn satyp alu kezínde satushylardan ónímge sáıkestík sertıfıkatyn talap etu kerek. Árbír pırotehnıkalyq būıymda memlekettík jáne orys tílderínde qoldanu jóníndegí tolyq nūsqaulyqtyń boluy míndettí. Nūsqaulyqpen tanysqan kezde saqtau merzímíne erekshe nazar audaru qajet. Eger ónímníń merzímí ótíp ketken bolsa, ony paıdalanuǵa qatań tyıym salynady. Mereke kúnderíńíz qauípsíz bolsyn. Qauípsízdík - qarapaıym qaǵıdalar saqtalǵan jerden bastalady, – dedí QR ÍÍM ÁPK-níń erekshe tapsyrmalar jóníndegí aǵa ınspektory Aqtoty Boranova.