2025 jyly Qazaqstanda avtomobıl joldaryn salý jáne kútip-ustaý sapasyn arttyrýǵa, naryq qatysýshylarynyń jaýapkershiligin kúsheıtýge, sondaı-aq jol ınfraqurylymyn paıdalanýshylardyń quqyqtaryn qorǵaýǵa baǵyttalǵan avtojol salasynda birqatar mańyzdy reformalar iske asyryldy. Barlyq jańashyldyqtar zańnamalyq jáne normatıvtik-quqyqtyq deńgeıde bekitildi, - dep habarlaıdy Aqshamnews.kz.
Negizgi qadamdardyń biri – jol-qurylys materıaldarynyń biryńǵaı bazasyn zańnamalyq turǵyda bekitý boldy (https://rcmbase.qazjolgzi.kz/). Bul platforma avtomobıl joldaryn salý jáne jóndeý kezinde qoldanylatyn materıaldar men tehnologıalar týraly derekter jınaqtalǵan ortalyqtandyrylǵan aqparattyq júıe bolyp tabylady. Barlyq málimetter synaqtan ótken jáne sapasy men qoldaný salasyn rastaıtyn qujattarmen súıemeldenedi. Sonymen qatar, bazada karerler, asfáltbeton zaýyttary jáne ózge de óndiristik nysandar týraly aqparat qamtylǵan.
Aǵymdaǵy jyly jol qurylysy sapasyna tehnıkalyq jáne avtorlyq qadaǵalaý salasyndaǵy jaýapkershilik kúsheıtildi. Endi qadaǵalaýdy júzege asyratyn uıymdardyń shtatynda jol qurylysy salasynda bilikti mamandardyń bolýy mindetteldi, bul buryn akredıtteý kezinde mindetti talap bolyp sanalmaǵan. Budan bólek, «Sybaılas jemqorlyqqa qarsy is-qımyl týraly» zańǵa engizilgen túzetýler aıasynda tehnıkalyq jáne avtorlyq qadaǵalaýdy júzege asyratyn tulǵalar memlekettik fýnksıalardy oryndaýǵa ýákilettik berilgen adamdarǵa teńestirildi. Bul olardyń zań aldyndaǵy jaýapkershiligin edáýir arttyrady.
Aqyly avtomobıl joldaryn paıdalanýshylardyń quqyqtaryn qorǵaý da mańyzdy jańalyqtardyń biri boldy. Endi defektiler nemese joldyń normatıvtik jaı-kúıine sáıkes kelmeý faktileri anyqtalǵan aqyly jol ýchaskeleri boıynsha júrgizýshiler jol júrý aqysyn tóleýden bosatylady. Mundaı ýchaskelerde tólem kemshilikter tolyq joıylǵanǵa deıin alynbaıdy.
Taǵy bir mańyzdy qadam – avtomobıl joldary úshin naqty jóndeý merzimderin bekitý. Normatıvtik deńgeıde jol sanaty, qozǵalys qarqyndylyǵy jáne klımattyq jaǵdaılar eskerile otyryp, aǵymdaǵy, orta jáne kúrdeli jóndeý jumystarynyń jańa kezeńdiligi aıqyndaldy.
Sondaı-aq jol salasy qyzmetkerleriniń biliktiligin arttyrý qaǵıdalary bekitildi. Jańa talaptarǵa sáıkes, mamandar keminde úsh jylda bir ret, keminde 40 akademıalyq saǵatty quraıtyn oqýdan ótýge mindetti. Al jol uıymdarynyń basshylary laýazymǵa taǵaıyndalǵannan keıin alty aı ishinde kúndizgi oqý formatynda bilimin jetildirýi tıis. Oqý qorytyndysy boıynsha qorytyndy baǵalaý júrgizilip, úsh jyl merzimge sertıfıkat beriledi.
Jalpy alǵanda, qabyldanǵan sharalar standarttaýǵa, sıfrlyq esepke alýǵa, sapany baqylaýdy kúsheıtýge jáne avtomobıl joldaryn paıdalanýshylardyń múddelerine negizdelgen avtojol salasyn basqarýdyń jańa modelin qalyptastyrady.