20 jeltoqsannan 11 qańtarǵa deıin Almaty sırki qala turǵyndary men qonaqtaryn jańa jyldyq kóńil-kúıge bóleıtin «CHRISTMAS STARS» atty merekelik shoý-premerany tamashalaýǵa shaqyrady, - dep habarlaıdy Aqshamnews.kz.
Bul erekshe baǵdarlama qysqy maýsymnyń basty oqıǵalarynyń birine aınalyp, kórermenderge sıqyrǵa toly áser syılamaq.
17 jeltoqsan kúni atalmysh jobanyń alǵashqy, qaıyrymdylyq qoıylymy ótti.
Oǵan balalar úıleriniń tárbıelenýshileri, az qamtylǵan otbasylardyń balalary jáne erekshe bilim berý qajettilikteri bar balalar arnaıy shaqyryldy. Bul kesh kishkentaı kórermenderge shattyq pen umytylmas áser syılaǵan naǵyz merekege aınaldy.
«CHRISTMAS STARS» - jyl saıyn asyǵa kútetin jańa jyldyq ertegi. Qoıylym kórermendi meıirim, dostyq pen ǵajaıyptar toǵysqan áserli atmosferaǵa engizip, sırk manejin jaryq pen áýenge toly merekelik keńistikke aınaldyrady. Baǵdarlama eresekter men balalarǵa arnalǵan birtutas sújetke qurylǵan.
Shoýdyń basty bóliminde dressýrlanǵan ekzotıkalyq qustar men janýarlar - totyqustar, shımpanze, ásem júristi attar, shaǵyn tuqymdy ıtter jáne balalardyń súıiktisi aıýqyzy Iana óner kórsetedi.
Sonymen qatar kórermendi kásibı áýe jáne parter gımnasttary, akrobattar, ekvılıbrıser, jonglórler jáne artısik sheberligi joǵary oryndaýshylardyń qoıylymdary kútedi. Shoýdyń arnaıy qonaǵy - Máskeýden kelgen áıgili Bo kloýn. Ol Monte-Karloda ótken álemdik deńgeıdegi festıváldiń arnaıy júldegeri ári kloýnada óneriniń damýyna qosqan úlesi úshin marapattalǵan ónerpaz.
Qoıylymnyń kórkem tutastyǵyn arnaıy daıyndalǵan dekorasıalar, jaryq-ınjenerlik sheshimder, lazerlik effektiler, mýltımedıalyq proeksıalar jáne avtorlyq kostúmder aıshyqtaı túsedi. Zamanaýı tehnologıa men sırk óneriniń úılesimi kórermenge vızýaldy áserdiń jańa deńgeıin usynady.
«CHRISTMAS STARS» - bul jańa jyl qarsańynda bala qıalyn qaıta oıatatyn erekshe shoý.
20 jeltoqsan men 11 qańtar aralyǵynda Almatylyq sırk sizdi ertegige toly «CHRISTMAS STARS» qoıylymyna shaqyrady. Jańa jyldy sırkte qarsy alyp, siz de sıqyrdyń bir bólshegine aınalyńyz.