Sporttyq atýdan Qazaqstan quramasynyń qorjynynda Parıj Olımpıadasyna 3 lısenzıa bar. Bul týraly Týrızm jáne sport mınıstri Ermek Marjyqpaevtyń sporttyq atý federasıasynyń basshylary men jattyqtyrýshylar shtabymen kezdesýinde aıtyldy, dep habarlaıdy almaty-akshamy.kz.
Kezdesýde atalǵan quramanyń keıingi iri halyqaralyq týrnırlerdegi óneri qorytyndylanyp, Olımpıadaǵa daıyndyq jospary tanystyryldy.
Atap aıtsaq, Qytaıdaǵy Azıa oıyndarynda Qazaqstan quramasy stendtik atýdan – 2 altyn jáne 3 qola, oq atý boıynsha – 1 altyn, 2 kúmis jáne 2 qola medal jeńip aldy. Sary qurlyq dodasynda Z.Irnazarova, komandalyq skıt mıkstte Á.Orynbaı men E.Eshenko jáne áıelder arasyndaǵy komandalyq skıtte Z.Kravchenko, Á.Orynbaı, O.Panarına top jardy.
«Oq atý jáne stendtik atý – medaldar eń kóp sarapqa salynatyn sport túrleriniń biri. Ulttyq quramanyń keıingi jyldardaǵy nátıjeleri elimizde sporttyq atýdyń qarqyndy damyp kele jatqanyn kórsetedi. Mergenderdiń Azıa oıyndaryndaǵy jetistigi barshamyzdy qýantty. Ónimdi jumys atqarylǵany kórinip tur. Eń bastysy – sizder búkil eldiń úmitin aqtadyńyzdar. Alda lısenzıalyq jarystar men 2024 jylǵy jazǵy Olımpıada kútip tur. Osy sport túrin serik etken komanda kóshbasshylary irikteý saıystarynan sátti ótip, tórtjyldyqtyń basty dodasynda laıyqty óner kórsetedi dep úmittenemiz», - dedi Ermek Marjyqpaev.
Mınıstrlik málimetine súıensek, qazirgi ýaqytta sporttyq atýdan Qazaqstan quramasynyń qorjynynda Parıj Olımpıadasynyń 3 lısenzıasy bar. 2024 jylǵa 4 lısenzıalyq týrnır josparlanǵan: 2 stendtik jáne 2 oq atý boıynsha. Demek, joldamalar sanyn arttyrýǵa múmkindik bar.