Kolonıada 63 bala jazasyn ótep jatyr
Almaty qalasyndaǵy balalar kolonıasynda jazasyn ótep júrgen jasóspirimderdiń asyǵa kútetin merekeleriniń biri – Balalar kúni, dep habarlaıdy Almaty-akshamy.kz.
Atalǵan kolonıada memlekettik merekelerdiń barlyǵy da atalyp ótkenmen, balalar úshin 1 maýsymdaǵy merekeniń orny erekshe. Óıtkeni bul kúni olar saǵynyp júrgen ata-analarymen, týystarymen júzdesedi. Jyldaǵy dástúr boıynsha bıyl da mekeme qyzmetkerleri Balalar merekesinde «Ashyq esik» kúnin ótkizdi.
Respýblıkadaǵy qylmys jasaǵan balalar jazasyn óteıtin jalǵyz kolonıada qazirgi tańda 63 bala ustalýda. Onyń ishinde 49 bala asa aýyr qylmys jasaǵany úshin, 14 bala aýyr qylmys jasaǵany úshin sottalǵan.
Oınaqtap júrip ot basqan jasóspirimderdiń búgingi janashyry da, ata-anasynyń ornyndaǵy qamqorshylary da – mekeme qyzmetkerleri. Jazaly jasóspirimderge arnalǵan merekeni ashqan Almaty qalasy boıynsha Qylmystyq-atqarý júıesi departamentiniń bas mamany Madıar Serikuly Konkanov atalǵan merekeniń tarıhy men mańyzyna toqtalyp, balalardy tól merekelerimen quttyqtady.
«2022 jyldy Memleket basshysy Q-J.Toqaev Balalar jyly dep jarıalap, olardyń sapaly bilim alyp, egemendi elimizge qajetti mamandyq ıesi bolyp shyǵýlaryna basa nazar aýdarýda. Sondyqtan senderdiń erkin ómirge tezirek aralasyp, ózderińniń ańsaǵan maqsattaryńa jetýlerińe tilektespiz»-dedi M.Konkanov.
«Ashyq esik» kúni jasóspirimder ózderine arnalǵan merekelik konsertti ata-analarymen, baýyrlarymen birge tamashalady.
Sonymen qatar jazaly balalar men olardyń ata-analary mereke kúni sporttyq jarystarǵa da birge qatysyp, júldeli oryndar úshin baq synasty. Sporttyq jarystarda belsendilik tanytqan komandalarǵa arnaıy syılyqtar tapsyryldy.
Balalar merekesiniń sońynda sottalǵan balalar ata-analarymen birge merekelik dastarqanda bas qosty.