Qazaqstannyń burynǵy Mádenıet jáne sport mınıstri Arystanbek Muhamedıuly Prezıdent Qasym-Jomart Toqaevqa ashyq hat joldap, Memleket basshysynyń ádiletti qoǵam qurý baǵytyndaǵy bastamalaryn qoldaıtynyn jetkizdi. Ol óz úndeýinde birneshe máseleni qozǵap, quqyq buzýshylyqtarǵa qatysty derekterdi baıandap, zańsyzdyqtarmen kúresý qajettigin atap ótti, - dep habarlaıdy aqshamnews.kz
Muhamedıuly óz hatynda 2016 jyly mınıstr bolǵan kezinde kúmándi kompanıaǵa 3 mıllıon dollar aýdarýǵa qarsy bolǵanyn, onyń ornyna bul qarajatty İlıas Esenberlınniń «Kóshpendiler» trılogıasynyń jelisimen túsirilgen «Almas qylysh» tarıhı fılmine baǵyttaǵanyn atap ótti. «Men bul sheshimdi ádilettilik pen memlekettik resýrstardy qorǵaý maqsatynda qabyldadym», – dedi ol.
Eks-mınıstr sot jáne memlekettik qurylymdardaǵy keıbir máselelerdi aıta kele, ádiletsizdik pen zańsyzdyqty mysaldarmen keltirdi. Sonyń biri – Almaty qalasynyń Alataý aýdandyq sotynyń sýdıasy D.S. Aıqulovtyń 2024 jyly krıptovalúta arqyly múlikke tólem jasaǵan Arman Baıqadamnyń paıdasyna sheshim shyǵarýy. Muhamedıulynyń aıtýynsha, bul sheshim zańsyz ári ádiletsiz, sebebi Qazaqstanda krıptovalútanyń aınalymyna tyıym salynǵan bolatyn.
Sondaı-aq, ol Astana qalasynyń sýdıasy A. Qarymova úsh ret azamattyq-prosessýaldyq kodeksti buzyp, bir isti Serik Qarymsaqovtyń paıdasyna sheshkenin aıtyp ótti. Muhamedıuly bul áreketterdi zańǵa qaıshy dep baǵalap, sot júıesiniń ádildigi men táýelsizdigine kúmán keltirdi.
Eks-mınıstr elge aktıvterdi qaıtarý bastamasy aıasynda bolǵan jaǵdaıdy da mysalǵa keltirdi. 2024 jyldyń aqpan aıynda «Nomad Land’s» JSHS Respýblıkalyq joǵary sport sheberligi mektebin memleketke qaıtarýdy usynǵanymen, sot bul kelisimdi jaramsyz dep tanyǵan. Keıin Joǵarǵy sot bul múlikti jeke menshikke berý týraly sheshim shyǵaryp, ony qylmystyq toptyń múddesine qyzmet etetin tulǵaǵa tapsyrǵan.
Muhamedıuly, sonymen qatar, memlekettik baǵdarlamalardy baqylaý máselesin qozǵap, Prezıdent Jarlyǵymen qurylǵan Joǵarǵy aýdıtorlyq palata jumysyna keıbir sottardyń baǵynbaıtynyn alǵa tartty.
Sońynda eks-mınıstr Memleket basshysynan zańsyzdyqtarǵa tosqaýyl qoıýdy surap: «Sizden zańsyzdyq pen sizdiń saıasatyńyzǵa qarsy áreketterdi toqtatýdy ótinemin», – dep jazdy.
Eske salaıyq, Muhamedıuly 2022 jyly halyqaralyq kórme úshin bólingen 221 mıllıon teńgeni jymqyrý isi boıynsha 8 jylǵa bas bostandyǵynan aıyrylǵan bolatyn. Keıin onyń jazasy para alýǵa oqtalý deregi úshin 11 jylǵa deıin uzartyldy.