Jánibek Amanıazovqa 2 500 000 teńge berýdi ótindim
Búgin sot otyrysynda Atyraý oblysy ákiminiń burynǵy orynbasary Baqytgúl Hamenovaǵa sóz berildi, dep habarlaıdy Almaty-akshamy.kz QazAqparatqa silteme jasap.
Atyraýdaǵy №2 qalalyq sotta oblys ákiminiń burynǵy orynbasary Baqytgúl Hamenovaǵa, oblystyq mádenıet, tilderdi damytý jáne arhıv isi basqarmasynyń basshysy Aqylbek Rysqalıevke jáne «Balqytý» JSHS dırektory Ómirtaı Adamovqa qatysty sot ótip jatyr.
«Rysqalıev meni bul iske tek jaýapkershilikten jaltarý nemese óz isine jazany jeńildetý úshin tartyp otyr. Men árqashan sybaılas jemqorlyqtyń kez kelgen túrine qarsy boldym. Rysqalıev qaǵazǵa 4 500 000 teńge dep jazyp bergende, men muny túsingen joqpyn. «Men túsinbedim» dep jaýap jazdym. Ol: «Altyn Ordanyń» aqshasy» dep jaýap berdi. Men ony demeýshiliktiń aqshasy bolar dep túsindim. Eger ol zańsyz syıaqy nemese Adamovtyń aqshasy dep aıtqanda, bul zańsyz áreketti jasaýǵa jol bermeıtin edim. Muny demeýshilik aqsha dep oılap, Jánibek Amanıazovqa 2 500 000 teńge berýdi ótindim. Ony «Altyn Orda» is-sharasyn uıymdastyrǵany úshin Saraıshyq aýylynyń ákimine tapsyrýy tıis edi. Al qalǵan 2 000 000 teńgeni Rysqalıevke ózińe qaldyr dedim. Bul aqshany is-sharany ótkizý kezinde biz qaryz bolǵan «Asyl ólke» qoǵamdyq birlestigine berý kerektigin ashyp aıtpadym. Jibergen qateligim osy edi», - dedi Baqytgúl Hamenova.
Baqytgúl Hamenova men Aqylbek Rysqalıevtiń isi QR Qylmystyq kodeksiniń 366-baby 3-bóliginiń 3-tarmaǵymen tergeldi. Al «Balqytý» JSHS dırektory Ómirtaı Adamov QR Qylmystyq kodeksiniń 367-baby 2-bóligimen tergeýge alynǵan.
Atyraý oblysy ákiminiń orynbasary qyzmetin atqarǵan Baqytgúl Hamenova Abaı eskertkishin ornatýǵa bólingen qarajattan 4,5 mln teńge para aldy dep aıyptalyp otyr.
Eske sala ketelik, budan buryn Baqytgúl Hamenovaǵa qatysty sot qaıta jalǵasqanyn jazǵan edik.