Qyrkúıek aıynyń sońǵy kúnderinde teńge quny quldyrady. Árıne, bul jurtshylyqty birshama alańdatty. Óıtkeni, saýda júıesindegi baǵa boljamy da osyǵan tikeleı baılanysty.
Ulttyq Banktiń Tóraǵasy Tımýr Súleımenov jahandyq ınvestorlarmen kezdesýinde sońǵy eki aptada teńgeniń kúrt quldyraý sebebin túsindirdi, dep habarlaıdy almaty-akshamy.kz banktiń baspasóz qyzmetine silteme jasap.
«AQSH dollarynyń jahandyq deńgeıde kúsheıýi (damyǵan elderdiń valútalar qorjynyna qatysty AQSH dollarynyń ındeksi qyrkúıekte 2,5%-ǵa ósti), ımporttaýshylar tarapynan maýsymdyq suranystyń artýy, bazalyq mólsherlemeni tómendetý boıynsha qabyldanǵan sheshim Úkimettiń kvazımemlekettik sektor sýbektileriniń valútalyq túsimdi mindetti túrde satý týraly normany qoldanýynyń toqtatýy. Osy faktorlardyń jıyntyǵy teńge baǵamynyń qysqamerzimdi álsireýine ákeldi. Mańyzdy faktorlar turǵysynan alyp qaraǵanda, munaı baǵasynyń ósimi men tólem balansynyń jalpy jaǵdaıy turaqtandyrýshy áserge ıe bolyp, uzaq merzimde teńgege qoldaý kórsetedi», dedi ol.
Investorlarmen kezdesý barysynda Tımýr Súleımenov qazirgi ekonomıkalyq jaǵdaı men júrgizilip jatqan monetarlyq saıasattyń negizgi baǵyttary men aldaǵy syn-tegeýrinderge qatysty máseleni qozǵaǵan.
«Ulttyq Banktiń negizgi mindeti – proınflásıalyq qysymdy jumsartý jáne ınflásıany ortamerzimdi maqsatqa jaqyn 5% deńgeıinde turaqtandyrý. Barlyq kúsh-jiger osy maqsatqa jetýge baǵyttalady. Alaıda, teńgeniń aıyrbas baǵamy erkin ózgermeli qalpynda qala beredi. Sonda ǵana ekonomıka kez kelgen ózgeristerge tez beıimdeletin bolady», dedi ol.
Bank basshysy aqsha-kredıt saıasatynyń Ulttyq Banktiń burynǵy is-áreketteri men aqparattyq saıasatyna sáıkes júrgiziletinin málimdedi. Eger, naqty ınflásıanyń báseńdeý úrdisi qarqyndy bolsa, bazalyq mólsherlemeni de qalypty túsirý jalǵasatynyn, degenmen, fıskaldy yntalandyrýdaǵy áleýetti ulǵaıý táýekelderi jáne ekonomıkadaǵy turaqty suranys jaǵdaıynda ınflásıalyq kútýlerdiń joǵary deńgeıi onyń tómendeý keńistigin shekteýi múmkin ekenin de aıtty.
Al aqsha-kredıt saıasaty ádettegideı ashyqtyqqa, júıelilikke, túsinikti ári boljamdy bolý qaǵıdattaryna negizdelmek. Bank basshysy retteýshiniń yqtımal aýytqýlarǵa der kezinde den qoıý úshin jyldyq ınflásıanyń targetke kelý traektorıasyn qadaǵalap otyratynyn aıtty.
Investorlarmen bolǵan dıalog kezinde Ulttyq Bank qyzmetiniń basym baǵyttary retinde baǵa turaqtylyǵyn qamtamasyz etýden bólek, monetarlyq jáne fıskaldyq saıasatty úılestirý, ishki qarjy naryǵynyń turaqty jumys isteýin qamtamasyz etý jáne ony odan ári qalypty damytý isinde Úkimetpen tıimdi jumys jasalatyny aıtyldy.
Ol sondaı-aq, Ulttyq Banktiń ashyq ta aıqyn komýnıkasıalyq saıasatty jalǵastyrýǵa nıetti ekenin jáne ony odan ári jetildirýge kúsh salatynyn atap ótti.