Sýdyń durys ári tıimdi bólinýiniń arqasynda Talas ózenindegi «Oıyq» gıdrotoraby arqyly júrgizilgen ekologıalyq maqsatta sý jiberý nátıjesinde Jambyl oblysyndaǵy «Qazsýshar» fılıaly Qarakól kóline sý toltyryp, Sulýkól kóline de sý jetkize aldy.
Sonymen qatar Sarysý jáne Talas aýdandaryndaǵy tabıǵı jaıylymdarǵa da sý bardy, dep habarlaıdy aqshamnews.kz sala mınıstrligine silteme jasap.
Jergilikti ekojúıeni saqtaý jumystary sýarý maýsymy bastalmaı turyp júrgizildi. Bastapqyda osy maqsatqa «Oıyq» gıdrotoraby arqyly 120 mln tekshe metr sý jiberý josparlanǵan edi. Alaıda sáýir aıynyń ortasyna qaraı ekologıalyq maqsatta sý jiberýdiń jalpy kólemi 315 mln tekshe metrge jetti.
30 mamyr kúni Sý resýrstary jáne ırrıgasıa mınıstri Nurjan Nurjigitovtiń tapsyrmasy boıynsha Jambyl oblysyndaǵy «Qazsýshar» fılıalynyń mamandary arnaıy tekseris júrgizip, Talas ózeni arqyly jiberilgen sýdyń Sarysý jáne Talas aýdandaryna jetkenine kóz jetkizdi.
Óz kezeginde jergilikti turǵyndar atqarylǵan jumys úshin Sý resýrstary jáne ırrıgasıa mınıstrligine alǵys bildirip jatyr.
«Bıyl aldyńǵy jyldarǵa qaraǵanda sý qarqyndy keldi. Sý negizgi arnamen ótip, jaıylymdy jerlerge jaıyldy. «Qazsýsharǵa» rızamyz, sonyń jumysynyń nátıjesinde sý jaqsy keldi. Osyndaı kólemde sý jyl saıyn kelip turady dep úmittenemiz», – deıdi Shaǵalaly eldi mekeniniń turǵyny Ońlyáshim Dúısenbekov.
«Sý bıyl erte keldi. Naýryzdyń basynda bastalyp, mamyrdyń sońyna deıin jetti. «Qazsýsharǵa» alǵys aıtamyz. Egistikte shóp jaqsy ósip jatyr, sý mol. Qazir mal jaıyp, jumys istep jatyrmyz», – deıdi Igilik aýylynyń turǵyny Aralbaı Janbekov.