Konstıtýsıalyq komısıanyń ekinshi otyrysynda Qazaqstan Respýblıkasynyń Konstıtýsıasyna ózgerister men tolyqtyrýlar engizý jónindegi usynystardy kezeń-kezeńmen talqylaý bastaldy, - dep habarlaıdy aqshamnews.kz.
Otyrystyń barysynda Qazaqstan Respýblıkasy Parlamenti Májilisiniń depýtaty Snejanna Imasheva birinshi otyrys qorytyndysy boıynsha daıyndalǵan salystyrmaly kesteni tanystyryp, Preambýla men 1–39 baptardy júıeli túrde qaraýdy usyndy.
Usynylǵan ózgertýler konstıtýsıalyq qurylymnyń negizderin naqtylaý jáne nyǵaıtýǵa, normalardyń quqyqtyq anyqtyǵyn arttyrýǵa, sondaı-aq quqyq qorǵaý mehanızmderin kúsheıtýge baǵyttalǵany aıtyldy. Arnaıy nazar Preambýlanyń mán-maǵynasyna jáne qazirgi áleýmettik úrdisterdi eskere otyryp, konstıtýsıalyq normalardy jańartý qajettiligine aýdaryldy.
«Konstıtýsıanyń Preambýlasy — bul tek kirispe emes, Negizgi zańnyń ıdeıalyq-moraldyq ózegi, maqsatty aıqyndaıtyn jáne memlekettiń damý baǵytyn belgileıtin negizgi baǵdar», — dedi Snejanna Imasheva.
Odan keıingi talqylaý Konstıtýsıanyń I jáne II bólimderindegi normalarǵa qatysty boldy, sonyń ishinde quqyqtyq jáne zaıyrly memleket prınsıpterin bekitý, adam qadir-quqyǵyn, ómir súrý quqyǵyn, jeke erkindik pen tulǵanyń qaýipsizdigin qorǵaý, sondaı-aq jeke ómir men jeke derekterdi qorǵaý máseleleri qaraldy. Sonymen qatar konstıtýsıalyq prınsıpterdiń normatıvtik mártebesin kúsheıtý jáne olardyń praktıkalyq qoldanylýyn qamtamasyz etý jónindegi usynystar talqylandy.
«Usynylyp otyrǵan ózgerister konstıtýsıalyq normalardyń qoldanylý tıimdiligin arttyrýǵa jáne olardyń túsindirilýine birtutas tásil qalyptastyrýǵa baǵyttalǵan», — dep aıtyldy otyrys barysynda.
Sonymen qatar, adamı kapıtaldy, bilim berýdi, ǵylym men mádenıetti damytý, áleýmettik kepildikterdi kúsheıtý, qorshaǵan ortany qorǵaý jáne otbasynyń quqyqtaryn saqtaý sıaqty bastamalar qaraldy. Usynystardy qaraý kezeń-kezeńimen júzege asyrylatyn bolady jáne Konstıtýsıalyq komısıanyń kelesi otyrystarynda jalǵasady.