Óńirlik komýnıkasıalar qyzmetinde QR TJM Respýblıkalyq jedel-qutqarý jasaǵynyń qutqarýshylary taýdaǵy qazirgi jaǵdaı men qysqy maýsymda saqtalýy tıis qaýipsizdik amaldary týraly baıandap berdi, - dep habarlaıdy aqshamnews.kz.
QR TJM RJQJ qutqarý bólimshesiniń bas qutqarýshysy Vadım Paktyń aıtýynsha, bıyl qysta ótken jyldarǵa qaraǵanda taýǵa qar qalypty jaýǵan, alaıda qalyń qar jaýǵan kezde qar kóshkini bolýy da ábden múmkin.
«Bıyl qar sırek jaýady, biraq mol túsedi. Qar jaýǵannan keıin bes–alty kún boıy tik betkeılerge, qarly jyraǵa shyǵyp, qardyń astynda turýǵa bolmaıdy, sebebi kez kelgen ýaqytta qar kóshýi yqtımal», – deıdi.
Spıkerdiń aıtýynsha, eńistigi 30–45 gradýstan asatyn betkeıler, qar basqan jerler men qar jaýǵannan keıingi jel jaq betkeıler eń qaýipti aımaqtarǵa jatady eken. Sondyqtan top bolyp júrgen kezde qaısysy bolsyn ara qashyqtyqty saqtap, qaýipti jerlerden bir-birlep, asa saqtyqpen ótýi tıis.
«Qaýipsizdik tehnıkasyn saqtamaı, jolǵa daıyndyqsyz shyǵyp, qar kóship, úsik shalýy múmkin ekenin kóbi eskere bermeıdi», – dep aıtty Vadım Pak.
Sońǵy jyldary qutqarý qyzmetiniń taýdaǵy jumysy kúsheıgen.
«Taýda qutqarý qostary men depolar ornatylyp, jańa kezekshilik pýnktteri ashylyp jatyr. Bul jedel áreket etip, azamattardyń ómirine der kezinde arasha túsip, qaýipsizdigin qamtamasyz etýge múmkindik beredi», – dedi spıker.
Óz kezeginde Ádilhan Baltabaı qysqy maýsym bastalǵaly beri taýly aımaqta shamamen 20 qutqarý operasıasy júrgizilip, 25 adam qutqarylǵanyn, bes adamǵa psıhologıalyq kómek kórsetilgenin habarlady.
«Qys kezinde múlde qaýipsiz aımaqtardy bólip kórsetý qıyn, sebebi taýly jerlerdiń árqaısysy ózinshe qaýipti. Ásirese daıyndyqsyz kelip, birden taýǵa bet alatyn týrıser kóp qaýip týdyrady», – dep atap ótti ol.
Sonymen qatar spıker Almatynyń taýly aımaqtaryndaǵy qoldanystaǵy qutqarý pýnktteri týraly aqparat berdi.
«Qazirgi tańda qalanyń mamandandyrylǵan taýly aımaqtarynda tórt qutqarý bólimshesi jumys isteıdi, onda qutqarýshylar táýlik boıy kezekshilik atqarady. Pýnktter Tuıyq-Sý lageri aýmaǵynda, «Medeý» taý-shańǵy kýrortynyń aýmaǵynda, Úlken Almaty shatqaly men Shybyndysaı (Býtakovka) shatqalynda ornalasqan», – deıdi Ádilhan Baltabaı.
Qutqarýshylar taýǵa shyǵar aldynda ózimen birge azyq-túlik qoryn, dári-dármek, jyly kıim, aýystyratyn aıaq kıim, baılanys quraldary, GPS-qurylǵylar men paýerbank alyp júrý qajettigin, sondaı-aq marshrýt pen qaıtyp oralatyn ýaqyty týraly jaqyndaryna eskertip otyrý kerektigin aıtty. Qar kóshkini qaýpi bar jerler týraly ózekti aqparat Qazaqstan Respýblıkasy Tótenshe jaǵdaılar mınıstrliginiń saıtynda jarıalanǵan.