Konstıtýsıalyq komısıa ekinshi otyrysynda «Quryltaı», «Halyq keńesi» bólimderi boıynsha normalardy talqylady, - dep habarlaıdy aqshamnews.kz.
Parlament Senatynyń depýaty, Nurlan Beknazarov Konstıtýsıalyq komısıa otyrysynda «Quryltaı», «Halyq keńesi» bólimderindegi normalarǵa toqtaldy.
Komısıa múshesiniń aıtýynsha, bir palataly Parlamentke ótýge baılanysty qoldanystaǵy Konstıtýsıanyń «Parlament» bóliminiń birqatar baptaryna onyń qurylýy, saılanýy, quzireti, ókilettigi, zań qabyldaý prosesteri men quramyna qatysty mańyzdy ózgerister engizý kózdelgen. Birqatar baptardyń kúshi tutastaı alynyp tastalady.
«Jobaǵa sáıkes, Qazaqstan Respýblıkasynyń Quryltaıy – Qazaqstan Respýblıkasynyń zań shyǵarý bıligin júzege asyratyn eń joǵary ókildi organy bolyp sanalady. Quryltaıdyń ókilettigi onyń birinshi sesıasy ashylǵan kezden bastalady jáne jańadan saılanǵan Quryltaıdyń birinshi sesıasynyń jumysy bastalǵan kezde aıaqtalady. Quryltaıdyń uıymdastyrylýy men qyzmeti, onyń depýtattarynyń quqyqtyq jaǵdaıy Konstıtýsıalyq zańda aıqyndalady», – dedi Nurlan Beknazarov.
Quryltaı konstıtýsıalyq zańda belgilengen tártippen birtutas jalpyulttyq saılaý okrýginiń aýmaǵy boıynsha proporsıonaldy ókildik etý júıesimen saılanatyn 145 depýtattan jasaqtalady. Depýtattardyń ókilettik merzimin bes jyl etip belgileý usynylǵan.
Sonymen birge, Komısıa otyrysynda Quryltaı depýtattaryn saılaý merzimderi men daýys berý tártibi, Quryltaı Tóraǵasyn saılaý, úmitkerlerge qoıylatyn talaptar men tyıymdar talqylandy.
Sondaı-aq, Prezıdent jańa reformalar aıasynda qoǵamymyzdyń eleýli damýyna, eldiń yntymaq-birligin nyǵaıtýǵa yqpal etetin qoǵamdyq-saıası birlestikter men belsendilerdi biriktiretin jańa joǵary konsýltatıvtik organ – Qazaqstan Halyq keńesin qurýdy usynǵan edi. Depýtat Ata zańǵa Halyq Keńesiniń ókildigine, quziretine, qatysty jeke bólimniń engizilýi konsýltatıvtik organnyń mańyzdylyǵyn aıqyndaıtynyn jetkizdi.
«Qazaqstan Respýblıkasynyń Halyq Keńesi – Qazaqstan halqynyń múddesin bildiretin joǵary konsýltatıvtik organ bolyp belgilenedi jáne onyń quramy Qazaqstan Respýblıkasynyń azamattarynan jasaqtalady. Halyq Keńesin qurý tártibi jáne onyń quramy, ókilettigi men qyzmetin uıymdastyrý máselelerin aıqyndaıtyn zańǵa Konstıtýsıalyq mártebe berilgenin erekshe atap ótý qajet», – dedi Nurlan Beknazarov.