Almaty qalasy polısıa departamentiniń kıberqylmyspen kúres basqarmasy sońǵy ýaqytta "1414' abonenttik nómirinen jiberiletin sms-kodtardy zańsyz paıdalanýǵa qatysty ınternet-alaıaqtyq derekteriniń kóbeıýine alańdaýshylyq bildirdi.
Vedomstvonyń málimetinshe, alaıaqtar sms-kodtardy psıhologıalyq aıla-sharǵy jasaý quraly retinde paıdalanady. Ádette, jábirlenýshige ózin poshta, salyq, komýnaldyq qyzmet nemese quqyq qorǵaý organynyń qyzmetkeri retinde tanystyrǵan bóten adam qońyraý shalady, dep habarlaıdy aqshamnews.kz Polisia.kz-ke silteme jasap.
Olar jábirlenýshini úshinshi tarap qosymshalaryn ornatýǵa nemese syrtqy siltemelerdi basýǵa májbúrleıdi. Mundaı áreketter jeke derekterdiń, sonyń ishinde sms-kodtyń qoldy bolýyna ákeledi. Nátıjesinde bul bank shottaryn buzýǵa jáne qarjylyq zalal keltirýge sebep bolýy múmkin. Alaıda, ol "1414" nómirinen kelgen sms-kodtardyń nesıe alýǵa múmkindik bermeıtinin atap ótti. Sebebi bankter bıometrıalyq aýtentıfıkasıa júıesi men arnaıy qaýipsizdik sharalaryn qoldanady.
Degenmen alaıaqtar bul kodtardy jábirlenýshilerdiń senimin jaýlap alý jáne psıhologıalyq qysym kórsetý quraly retinde paıdalanady. Mundaı alaıaqtyq áreketterdiń negizgi qurbandary kóbinese egde jastaǵy adamdar bolady. Birqatar jaǵdaılarda alaıaqtar azamattardy depozıtterden aqshalaryn sheship alyp, "saqtandyrý shotyna" salýǵa kóndirgen.
Sonymen qatar, nesıe alý áreketi týraly jalǵan aqparat taratyp, adamdardy múlkin kepilge qoıýǵa nemese satýǵa ıtermelegen jaıttar tirkelgen. Kóp jaǵdaıda jábirlenýshiler alaıaqtardyń kórsetken shottaryna óz erikterimen aqsha aýdarady nemese qarajatty jetkizý qyzmetiniń kýrerleri arqyly beredi. Polısıa azamattardy abaı bolýǵa, kúmándi qońyraýlar men habarlamalarǵa jaýap bermeýge shaqyrady.