Premer-mınıstr Álıhan Smaıylov Qarmet kompanıasynyń aǵymdaǵy jumysy men kásiporyndy odan ári damytýdyń ózekti máseleleri qaralǵan keńeste kásiporyn jumysshylary aldyndaǵy barlyq mindettemelerdi ýaqtyly oryndaý qajet ekenin atap ótti, dep habarlaıdy almaty-akshamy.kz. .
Úkimette ótken keńeste ortalyq memlekettik organdardyń birinshi basshylary jáne jańa ınvestordyń qatysýymen kásiporynnyń operasıalyq prosesterin turaqtandyrý, ony qajetti shıkizatpen qamtamasyz etý, sondaı-aq birqatar quqyqtyq rásimderdi júrgizý sharalary talqylandy, dep jazdy vedomstvonyń baspasóz qyzmeti.
Odan bólek, kombınat jabdyqtaryn jańǵyrtýdy, zamanaýı óndiris tehnologıalaryn engizýdi jáne ónerkásiptik qaýipsizdik standarttaryn arttyrýdy kózdeıtin ınvestısıalyq baǵdarlamany iske asyrý máseleleri qaraldy. Atap aıtqanda, birinshi kezeńde osy maqsattarǵa shamamen 1,3 mlrd dollar jeke ınvestısıalar bólinetin bolady.
"Premer-mınıstr kásiporyn jumysshylary aldyndaǵy barlyq mindettemelerdi ýaqtyly oryndaý qajettigin atap ótti. Úkimet basshysy osyǵan oraı, óndiristi odan ári serpindi damytýdyń, shyǵarylatyn ónim kólemin ulǵaıtýdyń jáne anyqtalǵan ekologıalyq zańnama talaptaryn buzýshylyqtardy kezeń-kezeńimen joıýdyń mańyzdylyǵyn atap ótti", – delingen resmı habarlamada.
Talqylaý qorytyndysy boıynsha Álıhan Smaıylov ortalyq memlekettik organdarǵa aǵymdaǵy máselelerdi sheshýde kásiporynǵa qajetti qoldaý kórsetýdi jáne ınvestormen birlesip, Qarmet-ti damytýdyń árbir baǵyty boıynsha naqty is-qımyl josparyn ázirleýdi tapsyrdy.