Sońǵy kezde omyrtqa aýrýyna shaldyqqan jastar kóp.
Mamandar osylaı dep dabyl qaǵyp otyr. Tipti tirek-qozǵalys júıesindegi eń kóp taraǵan aýrýlardyń birine aınalǵan, dep habarlaıdy Almaty-akshamy.kz «Habar 24» saıtyna silteme jasap.
Ásirese, skolıozǵa shaldyqqan jetkinshekter kóp. Dárigerler bul aýrýǵa beıjaı qaramaı, erterek aldyn alý qajettigin aıtady. «Jalpy omyrtqa aýrýlarynyń 52 túri bar», – deıdi mamandar. Deni julyn men júıke tamyrlary omyrtqa arasynda qysylǵan kezde birden baıqalady eken. Saldarynan adamnyń beli, aıaq-qoly, basy, tipti ishki aǵzalarynyń aýyrý údeı túsedi. Buǵan túrli faktorlar áser etýi múmkin. Kompúter aldynda uzaq otyrý, aýyr júk kóterý de omyrtqa aýrýyna ákep soǵady. Al qazir balalar arasynda skolıoz aýrýy kóbeıgen. Aýyr sómke arqalap nemese túrli gadjetterge telmirýdiń saldary omyrtqada jaryqshaǵyna ákep soqtyrady.
«Kóp jaǵdaıda týabitti bolady nemese bir jaraqat alyp qalady, sol kezde omyrtqamyz qataıyp qalýy múmkin. Onyń ústine aýyr jumys bar, kishkentaı balalar aýyr sómke kıedi. Múmkindiginshe balany kishkentaı kezden qarap, omyrtqasy qısaıǵan bolsa, ornyna keltirse, omyrtqanyń qozǵalys qyzmetin jaqsartsaq, bári jaqsy bolady», - deıdi osteopat dáriger Serik Aqshalov.
Al mamandar: «Skolıozdyń asqynýy óte qaýipti», – dep otyr. Iaǵnı keýde qýysynyń qısaıýy, júrekten tartyp, ishki aǵzalardyń jumysyn nasharlatady. Skolıoz asqynǵan jaǵdaıda tek operasıa arqyly túzeýge bolatyndyǵyn aıtady. Al ony túzetý – eń kúrdeli operasıalardyń biri. Al buryn jasy 40-50-den asqan úlken adamdarda kezdesetin osteohondroz aýrýy da jasara bastaǵan.
«Kóbinese keńse qyzmetkerleri men jastarda moıyn jáne bel osteohondrozy kezdesedi», – deıdi mamandar. Sondyqtan dárigerdiń kómegimen qatar únemi qozǵalysta júrgen paıdaly. Al myna bilikti maman usynǵan laıfhakti muqıat oryndasańyz, aýrýdyń aldyn alýǵa bolady.
«Men maman retinde omyrtqa aýrýlarynyń aldyn alatyn qarapaıym tásilmen bóliskim keledi. Eń áýeli ol úshin eki úlken tenıs dobyn jańa shulyqqa ortasyn túıinshektep salamyz. Daıyn bolǵan kishkentaı jastyqshany qaraqustyń tusyna tósep, túzý ári qatty jerge jatyp 10 mınýt demalý qajet. Dál sondaı jastyqshanyń ekinshisin quımyshaq tusyna qoısa da bolady. Sonda omyrtqamyz sozylyp, súıekterdiń zat almasýy jaqsara túsedi», - deıdi medısına ǵylymdarynyń kandıdaty Rızaýl Mánjigitova.
Denimiz saý bolsyn desek, omyrtqany únemi jattyqtyryp otyrý qajet. Mamandar osylaı dep keńes beredi. Arqa bulshyqetterin qataıtý mańyzdy. Iaǵnı bulshyqetter myqty bolsa, omyrtqaǵa túsetin salmaq ta azaıady. Omyrtqa saýlyǵy – jalpy denniń saýlyǵy. Avtory: Aınur Qýatqyzy Murat Áriphanov