Sısılıada aptap ystyq jáne temperatýra reordtyq deńgeıge jetti. Katanıada joǵary temperatýradan jaryq pen sý sóndirildi, sebebi júıeniń shamasy jetpeı jatyr, dep habarlaıdy Almaty-akshamy.kz Euronews-ke silteme jasap.
Jergilikti azamattyq qorǵanys qyzmetiniń málimetinshe, dúısenbi kúni Katanıada 47,6°C tirkelgen. Aptap ystyqtan júz myńdaǵan sısılıalyq jaryq pen sýsyz otyr.
«Bir jaǵynan, klımattyń ózgergeni úshin zardabyn tartyp jatyrmyz. Buǵan birneshe jyl buryn nazar aýdarýymyz kerek edi. Ekinshi jaǵynan – jańa jaǵdaıǵa sáıkes kelmeıtin ınfrastrýktýra úshin», - dedi Italıa azamattyq qorǵanys mınıstri Nello Mýsýmechı.
Beısenbiden bastap Katanıada 500 myń adam kezekpen jaryqsyz otyrady, dedi mýnısıpalıtet ókili.
E-distribuzione – Enel alyp ıtalıalyq kompanıanyń enshiles fırmasy mundaǵy elektr energıasyn taratýmen aınalysady. Onyń málimetinshe, «birneshe apta boıy asfált temperatýrasy 50°C-qa jýyqtaǵan». Oǵan ylǵal aýa qosylǵanda, «jylý durys taramaı, kabelderdi zaqymdap jatyr».
Elektr energıasynyń óshýi saldarynan birneshe úıde sý toqtaǵan. Jalpy, 200-300 myń adam sýsyz qalǵan, dedi Sıdra sý berý jelisi.
E-distribuzione kompanıasy júzdegen tehnıkalyq maman men ondaǵan generatordy tartqanyn málimdedi. Jergilikti bılik qart adamdarǵa jáne basqa da osal toptaǵy adamdarǵa, sondaı-aq úısizderge kondısıonerler berip, turǵyndardan kondısıonerlerdi qalypty paıdalanýdy surady.
Keshe sısılıalyq órt sóndirýshiler birneshe órt oshaǵymen kúresti. Palermo áýejaıynyń janynda órt shyǵyp, seısenbi kúni tańerteń áýe aılaǵy birneshe saǵatqa jabyldy. Órtten temirjol kóligi zardap shekti.