Jambyl atyndaǵy memlekettik jasóspirimder kitaphanasynda Halyqaralyq sırek kezdesetin aýrýlar kúnine oraı «Zara óziniń jolaqtary týraly aıtady» balalar kitaby tanystyryldy.
Zara – zebra-keıipker. Ol adamdar arasynda sırek kezdesetin dertke shaldyqqan balalardy ózin ózge qatarlastarynan kem sanamaýǵa úıretýge umtylady, olardyń óz dıagnozyn qabyldaı alýyna kómektesedi. Sondaı-aq kishkentaı ala qulan sóziniń sońynda eresekterge erte dıagnostıkanyń, ýaqytyly medısınalyq kómek pen psıhologıalyq qoldaýdyń mańyzdylyǵyn da aıtyp ketedi.
Respýblıkalyq elektrondy densaýlyq ortalyǵynyń málimetine súıensek, búginde elimizde 80 myńnan astam adam sırek kezdesetin aýrýlarmen kún keshýde. Olardyń 20 myńǵa jýyǵy bala.
AstraZeneca kompanıasy shyǵarǵan erekshe týyndy – balalarǵa arnalǵan osy baǵyttaǵy eń alǵashqy kitap. Qazaqsha jáne oryssha basylǵan. Kesh barysynda otandyq belgili sırk artısi Murat Mutyrǵanov kitaptan úzindi oqydy. Al «Jańa ómir» qoǵamdyq qory pasıentter uıymynyń ókili Saltanat Mahambetova sırek kezdesetin aýrýlardyń erte dıagnostıkalaý qajettiligi, terapıanyń qoljetimdiligi, otbasylarǵa áleýmettik, psıhologıalyq qoldaý kórsetý mańyzdylyǵy týraly saýaldarǵa jaýap berdi. Iá, sırek kezdesetin derttermen aýyratyn naýqastarmen jumys isteýde, dıagnostıkadan bastap qajetti terapıany alýǵa deıingi qıyn jolda adamdarǵa qoldaý kórsetýde pasıent uıymdary da mańyzdy ról atqarady.
Aıta keteıik, AstraZeneca – onkologıa, kardıologıa, nefrologıa, metabolıkalyq buzylýlar, respıratorlyq aýrýlar jáne aýtoımmýndyq aýrýlardyń terapevtik salalarynda resept boıynsha beriletin dári-dármekterdi ashýǵa, damytýǵa jáne komersıalandyrýǵa baǵyttalǵan ǵylymı negizdelgen jahandyq bıofarmasevtıkalyq kompanıa. Kompanıa 100-den astam elde jumys isteıdi jáne onyń ınovasıalyq preparattaryn búkil álem boıynsha mıllıondaǵan pasıent paıdalanady.
– Sırek kezdesetin aýrýlarmen aýyratyn naýqastarǵa medısınalyq kómek kórsetýdi uıymdastyrýdy jaqsartý úshin byltyr elimizde UMC bazasynda sırek kezdesetin aýrýlardy dıagnostıkalaý men emdeý tásilderin birizdendirýge jáne molekýlárlyq dıagnostıkanyń qoljetimdiligin arttyrýǵa múmkindik beretin Respýblıkalyq orfandyq aýrýlar ortalyǵy quryldy. Almatyda №2 qalalyq balalar klınıkalyq aýrýhanasynyń bazasynda QMÝ balalar nevrologıasy kafedrasymen birlesip, sırek kezdesetin keselderge shaldyqqan balalarǵa bilikti kómek kórsetý úshin dıagnostıkalyq múmkindikteri keń, joǵary dárejeli dárigerlerden turatyn úlken kópsalaly top quryldy. Al búgingi kitaptyń tusaýkeseri sırek kezdesetin aýrýlar týraly habardar etý jáne olardy der kezinde dıagnostıkalaýdyń mańyzdylyǵyn arttyrýdaǵy taǵy bir qadam boldy dep sanaımyn, – deıdi Almaty qalasynyń shtattan tys bas balalar nevrology Gúzel Hýdaıberdıeva.