Almaty qalasy Bilim basqarmasynyń Qalalyq bilim berýdegi jańa tehnologıalardyń ǵylymı-ádistemelik ortalyǵy (QBJTǴÁO) shet eldegi taǵylymdamalar arqyly pedagogterdiń kásibı deńgeıin arttyrýǵa aıryqsha mán berip keledi. Atalǵan ortalyqtyń dırektory Dáýren Saǵynǵalıev muǵalimderdiń Sıngapýr elindegi taǵylymdamasynyń qorytyndysymen bólisip, halyqaralyq yntymaqtastyqtyń otandyq bilim berý júıesine yqpalyn atap ótti.
Almaty qalasyn damytýdyń 2025 jylǵa deıingi baǵdarlamasy jáne 2030 jylǵa deıingi orta merzimdi perspektıvasyn iske asyrý jónindegi Jol kartasyna sáıkes, 2024 jyldyń qyrkúıek aıynda qala mektepteriniń 63 ınformatıka páni muǵalimi Sıngapýrde taǵylymdamadan ótti. Bul issapardyń maqsaty – pedagogterdiń kásibı quzyrettiligin arttyrý, robototehnıka, baǵdarlamalaý, jasandy ıntellekt pen zamanaýı aqparattyq-kommýnıkasıalyq tehnologıalardy oqytý ádistemelerin meńgerý jáne olardy Almaty qalasynyń bilim berý júıesine beıimdeý.
Taǵylymdama aıasynda pedagogter halyqaralyq bilim berý júıesiniń erekshelikterimen tanysyp, oqytýdyń ınovasıalyq tásilderin, İT quraldarmen tıimdi jumys isteý daǵdylaryn jetildirdi. Oqý baǵdarlamasy sıfrlyq saýattylyqty arttyrýǵa, jeke bilim traektorıalaryn qalyptastyrýǵa, İT jobalardy uıymdastyrý jáne komandada jumys isteý qabiletin damytýǵa baǵyttaldy. Sonymen qatar, muǵalimder İT salasyndaǵy etıka men jaýapkershilik, úzdiksiz kásibı damý uǵymdaryn tereń meńgerdi.
Taǵylymdama aıaqtalǵannan keıin QBJTǴÁO qalanyń 216 mektebinde Sıngapýr tájirıbesin taratý maqsatynda aýqymdy semınarlar uıymdastyrdy. Bul sharalarǵa 1000-nan astam ınformatıka páni muǵalimi qatysty. Semınarlar barysynda qatysýshylarǵa AKT men jasandy ıntellektti bilim berý prosesine tıimdi engizý, oqýshylardyń synı oılaýyn damytý, praktıkalyq daǵdylaryn qalyptastyrý joldary usynyldy. Sonymen qatar Python baǵdarlamalaý tili boıynsha sheberlik sabaqtar ótkizilip, naqty mysaldar men keıster negizinde tájirıbe almasý júzege asty.
Buǵan qosa, 2023 jyldyń qazan aıynda QBJTǴÁO-nyń oqý jumysy jónindegi bóliminiń ádiskerleri fızıka, hımıa, bıologıa jáne geografıa pánderiniń 2500-den astam muǵalimine arnalǵan oqytý semınarlaryn uıymdastyrdy. Semınarlar Sıngapýrde taǵylymdamadan ótken pedagog-trenerlerdiń jetekshiligimen ótti. Onda zertteýge negizdelgen oqytý, pándik-ǵylymı saýattylyqty damytý, oqýshylardyń zerthanalyq jumystaryn tıimdi uıymdastyrý, zamanaýı oqý quraldary men sıfrlyq resýrstardy qoldaný joldary qarastyryldy.
Saýalnama nátıjelerine súıensek, semınarlarǵa qatysqan muǵalimderdiń 83%-y oqý úderisinen joǵary qanaǵattanýshylyq bildirip, semınarlardy óz jumys tájirıbesinde qoldanýǵa daıyn ekenderin jetkizgen.
Qalalyq ádistemelik ortalyqtyń dırektory Dáýren Saǵynǵalıevtiń aıtýynsha, bul tájirıbeler almatylyq muǵalimderdiń kásibı damýyna serpin berip qana qoımaı, qala mektepterinde bilim sapasyn arttyrýǵa baǵyttalǵan naqty ári nátıjeli qadam boldy. Ortalyq aldaǵy ýaqytta da halyqaralyq taǵylymdamalar men zamanaýı pedagogıkalyq tájirıbelerdi jergilikti júıege endirý jumystaryn jalǵastyrmaq.
